February-ah AMC inthlan a nih ka ring - Dy. Chief Minister

Deputy chief minister Tawn­luia, MNF senior vice president ni bawk chuan February 2021-ah Aizawl Municipal Corporation (AMC) inthlan a nih a rin thu a sawi.

January 14, Ningani zana Bawngkawna MNF zawm thar lawm luhna inkhawmah thu sawiin Tawnluia chuan, "Covid boruak a ziaawm chhoh zel chuan February thla hian AMC inthlang turin vote kan thlak hman ka ring," a ti.

Tawnluia chuan, MNF sorkar hnua inthlan hrang hrang - MP, LC/VC, Lai Autonomous District Council inthlanahte MNF an la chak zel tih sawiin, "AMC inthlan kan hmachhawn turah hian local council zaa sawm kua dawn kan neihna a ni a, kan chak ngei kan ring," a ti a; mipui rilruah sorkar lai sorkartir tumna a awma a hriat thu leh an hlim thu a sawi.

MNF Sr Vice President chuan, an party innghahna chu 'Pathian leh kan ram tan' tih a nih thu sawiin, "Hei hi kan rilruah riak reng se la, Lalpa hming lam tel theih lohna thil tih MNF party-ah a rem lo. Kan Pathian hming kan lam a, kan chhuan leh kan innghahna a ni. Ram kaihruai turin Pathianin mipui hmanruaa hmangin min dah a, kan rawngbawl hna hi dikna leh rinawmna nen thawk tur kan ni," a ti. 

AMC inthlana Ward II-a MNF candidate tur Lalringliana pawhin thu sawiin, amah vote vek turin Ward-II mipui a sáwm a; AMC-a MNF sorkar hmasaah mipui thlàwp an hlawh ṭha a, inthlan awm turah pawh mipui thlàwpna ṭha an dawn leh ngei a beisei thu a sawi.

Inkhawmah hian Congress party aṭang leh neutral mi 149 MNF-ah lawm luh a nih thu MNF thuchhuah chuan a tarlang.