DR Congo-ah ni khatah Ebola kai thar 71 awm

Democratic Republic of Congo rama leng mek, Ebola hri kai thar chu kar liam ta Zirtawpni khan mi 71 hmuh chhuah an awm tih health ministry data chuan a tarlang. Hri hi a darh chak hle tih an tarlang bawk.

May 15-a Ebola Bundibugyoa strain a leng tih puan a nih hnuah, World Health Organisation in hri kai finfiah tawh a chhinchhiah hi mi 452 an ni tawh a, an zinga 82 in an thihpui tawh bawk. Uganda ramah hri kai finfiah tawh hi 19 awmin, mi pahnih an thi tawh bawk a ni. Zirtawpnia hri kai thar hmuh chhuah zinga 65 hi hri len ṭanna, Ituri province amite an ni.

WHO chuan Ebola hri leng vang hian khawvel huapin public health emergency a puang tawh a, Ebola hri len nasat ber ṭum a nih mai theih thu a sawi. US Centres for Disease Control and Prevention director, Jason Asher chuan hri leng dona kawnga chak taka hma lak a nih loh chuan, kum 2014-a West Africa-a hri kai mi 28,000 chuang an awm leh, thihpui mi 11,000 chuang an awm ang dinhmun khan a thlen mai theih thu a sawi.

Hri leng mek dona atana hma lakna turin WHO leh African CDC chuan thla ruk chhung atan USD mtd 518 mission plan an siam. Hri hi a darh chak a, theihtawp kan chhuah a ngai a ni, tiin WHO hotu Tedros Adhanom Ghebreyesus chuan a sawi. "He hri leng hi a darh mekna hmunah hian kan dan chah a ngai a, tun huna hma la mek ramte kan ṭanpui a ngai bawk a ni. DR Congon ṭhenawm ramte pawhin natna a luh ruala an hmuh chhuah vat leh hma an lak vat theih nan an inrinlawk dan tur kan siam a ngai a ni," tiin "He hri leng hi a hlauhawm hle a, ṭan ruala hma kan lak vat a ngai a ni," a ti.