ZPM MLA-te'n Serchhip bial mipuite Lalduhoma thlang leh turin an ngen

ZPM Legislature Party (ZLP) MLA-te chuan nimin khan Serchhip Press Club-ah thuthar thehdarhtute an kâwm a; Assembly by-election awm turah Lalduhoma thlang tling leh ngei turin Serchhip bial mipui an ngen.

ZLP leader thar Vanlalhlana chuan, MLA aṭanga Lalduhoma bàn a ni chuan Mizoram mipui a barakhaih a, an khawngaih hle nia sawiin, "Serchhip bialtu MLA atana Pu Lalduhoma thlangtu mipui duhthlanna kan zahin kan lainat tak zet. Sorkar dik taka a kal theihna tur te, sorkar sum dik leh ṭha taka hman a nih theihna tur leh, project leh scheme-te dik leh chak taka kalpui a nih theih nan ram rorelnaah opposition chak tak neih a ngai a ni," a ti. 

Vanlalhlana chuan, sorkar khalh ngíl tura thawh hlâwk ber chu Lal­duhoma a nih thu leh MLA aṭanga paih a ni chu pawi an tih thu sawiin, "Zoram mipuiah sorkar hian opposition chak neih a hlau em ni, tih zawhna a lian hle. Pu Lalduhoma kaihhruaina hnuaiah opposition party-te chu sorkar khalh ngíl turin kan ṭha tawkin kan hria a, ram tana rawng a bàwl zui zel theih nan MLA a nih leh ngei a ṭul," a ti a; ram leh hnam tan Lalduhoma thlang tling leh ngei turin Serchhip bial mipui an ngen tih a sawi.

Thuthar thehdarhtute zawhna chhángin ZPM MLA-te chuan, independent MLA ni mah se, MLA inthlanah ZPM candidate leh ZPM hminga tling an nih thu an sawi a, "Danin a phal chin zelah ZPM party kan thurualpui zel dawn. MLA aṭanga bàn a nih theih nana Pu Lalduhoma hêktute pawh kan khawngaih hle a, anmahni pawhin hrehawm an ti.

Mahse, nawrtu an awm avangin an ti lo ngam si lo. Pu Lalduhoma thlan tlin leh a nih chuan Serchhip bial chu inthlan leha chief minister bial tur chiang a ni," an ti.

Mizoramah sorkarna lo siam tawh political party-te'n mipuiah vote zawn nan sem policy an inzawrhsiak tih sawiin ZPM MLA-te chuan, "Hei hian mipui rilru a tichhe mek zel. ZLP chuan Zoram mipuiin an thawhrimna hmanga hlawhtlinna tluantling an neih theihna turin hma kan la zel dawn. Sum leh therhlo dang hmanga vote hlu tak inleisak tum hi mihring inzah lohna lian tak a ni," an ti. 

Vote lei tumtu politician-te chu ram tichhetu an ni tih hria a, huai taka hnâwl turin Serchhip bial mipui an chah a ni.