All India Ratio kum 90-na lawm a ni; Insuihkhawmna hmanrua a ni - CM

All India Radio (Akashvani) chuan nimin khan Vanapa Hall-ah an kum 90-na an lawm. Lawmna hun hmanpuitu chief minister Lalduhoma chuan, AIR chu Zo hnahthlak insuihkhawmna hman-raw pawimawh a nih thu a sawi.

Chief Minister chuan, AIR chu kum 90 chhung India mipui âwi tleitu ber a nih thu a sawi a, "A hlutna chu, a din aṭanga tun thlengin mipui thinlungah a la ngai reng. AIR programme hrang hrang hi ṭhenawm ram leh state tan a ṭangkai hle a, Zo hnahthlak insuihkhawmna hmanraw pawimawh tak a ni," a ti.

AIR chu ram chhung mai bakah, khawvel huapa radio network lian ber a nih thu sawiin Lalduhoma chuan, "Ṭawng hrang hranga thu puang darh tam ber a ni a, ṭawng chi hrang 23 leh chibil ṭawng 146 chuang ngaihthlak theih a ni," a ti a, ram 100 chuangah AIR ngaihthlak a nih thu a sawi.

CM Lalduhoma chuan, kum 2024-a Oxford University-a Reuters Institute for the Study of Journalism in Digital News Report 2024 a tihchhuahah Akashvani (AIR) news chu India ram chhunga chanchin thar puan chhuahna rintlak berah an puan thu a sawi a, "Hei hi India ram hmun hrang hranga mipui pawm dan a ni," a ti.

AIR chuan India ramin independence a hmuh theihna turin ṭangkai takin a thawk tih sawiin Lalduhoma chuan, "Mipui inlungrual nan a thawh hlawk hle," a ti a; AIR, Aizawl Station chu July 31, 1966-ah din a nih thu sawiin, rambuai laiin Mizo mipui tan chanchin thar puanah an pawimawh lehzual thu a sawi.

Chief Minister chuan, Mizo zinga zaithiam hmingthang tak takte chu AIR artist an nih thu sawiin, "Tun thlengin ram pumah AIR artist-te chu zaithiamte'n an hlut ber a la ni reng. AIR hi hnam zia humhalhtu pawimawh, lungngai leh khawhar hnemtu, lawmte lawmpuitu a ni," a ti.

Akashvani, Aizawl director DR Lalropuia pawhin thu sawiin, "Tunlai thiamna hmanga hmasawnna tam tak awm karah AIR chu mipui thinlungah ngaih pawimawh leh hlut a la hlawh reng," a ti a; tunlai hmasawn milin AIR-in thil thar an buatsaih ṭhin thu a sawi.

AIR kum 90 tlin lawmnaah hian AIR artist-te an zai a, AIR kum 90 zinkawng documentary thlirho a nih bakah, AIR, Aizawl Station-a vawi 100 chuang thu sawi tawhte hnenah chawimawina hlan a ni.