KHAWTHLIR

ṬKP, Kolasib Pastor Bial chuan nimin khan thisen pek an huaihawt a, an member-te'n Kolasib District Hospital blood bank-ah thisen unit 17 an pe a, a petute mipa 14 leh hmeichhia pathum an ni.

Nimin khan Zoom kaltlangin Young Men's Christian Association (YMCA), North East India Region (NEIR) Annual Regional Council meeting neih a ni a, YMCA (NEIR) regional chairman Dr R Lalthangliana'n a kaihruai. Ṭhutkhawmah hian Guwahati-a YMCA building ṭhiah dan tur te, hmarchhak bial chu Kristian tamna state an nih laia páwla inhmang an tlem avangin ṭhalai tam zawk an tel theih dan tur te, hmalakna atana sum hmuh dan turte sawiho a ni.

AH&Vety minister Dr K Beichhua chuan nimin khan Lungleia Veterinary Hospital sak mek a tlawh a, hna thawh dan a enfiah. Dr Beichhua chuan, in sak hna thawh tawh chin chu ṭha a tih thu sawiin, department hna contract-a thawk ṭhinte chu ram tana thawk an ni tih hriaa ṭha taka hna thawk zel turin a chah. Damdawi-in sak mek hi 90% zawh tawh a ni.

Traffic SP Rodingliana Chawngthu chuan hriattirna tichhuakin, SIPMIU-in January 18, Thawhṭanni aṭangin ni tin zing dar 9 leh tlai dar 4:30 inkarah Venghnuai kawtchhuah aṭanga Venghnuai Field inkarah pipe an phûm dawn avangin, hna thawh hun chhungin kawng khâr a ni dawn tih a tarlang. Kawng sirah lirthei leh bungrua dah phal a ni lo tih a tarlang bawk. 

Nimin tlai dar 5-a dinhmun angin, State Referral Hospital-ah Covid-19 vei mi 10 an awm mek a, Isolation ward-ah vek awmin, ICU-a enkawl ngai an awm lo a, kum 60 chung lam leh naupang kum 14 hnuai lam an awm lo. SRH-ZMC Bulletin tarlan danin, mi 10-te zinga pakhat chu oxygen pek mek a ni a, ngaihtuahawm erawh a ni lo.

Lunglei district bawrhsap V Lalsangliana chuan nimin khan a pisaah Lunglei district-a service voter final electoral roll 2021 a tlangzarh. Lunglei district-ah hian service voter 525 an awm a ni.

Mamit District Task Force on Covid-19 chu an chairman Dr Lalrozama, bawrhsap hoin nimin khan DC conference hall-ah an ṭhukhawm a, Mamit district-a Covid-19 vaccine pek dan tur an sawiho. Mamit district-ah hian Covid-19 vaccine pek tur mi 782 awmin, mi 450 pek hmasak an ni dawn a; healthcare worker-te tan January 18-19 chhungin Mamit District Hospital leh an district-a PHC thlan bikah pek tum a ni.

Kolasib SP chuan nimin khan thuchhuah siamin, Kolasib district-a lirthei neitute chu an lirthei remchang laiah mobile phone number bel turin a ngen. Ngenna hi mipui vantlang tana ṭha zawk tura ngaih a nih avangin ngai pawimawh turin lirthei neitute a ngen nghal a ni.

Legal Metrology chuan thuchhuah siamin, ram dang aṭanga dan loa meizial (cigarette) lak luh chu dan phal loh a nih avangin ram chhungah lâk luh, zawrh leh hralh khap tlat a nih thu an tarlang. Legal Metrology inspector-te chu an bial ṭheuhah dawrte endik tur leh ram dang meizial zuarte chu man turin an hriattir a ni.

UDPA department directorate-a thawkte chuan nimin khan an department hall-ah inhlan tharna hun an hmang a, UDPA changtu deputy chief minister Tawnluia'n a hmanpui. Department hnathawh thlir lêtna hun an hmang nghal bawk.

Minister of state K Lalrinliana chuan nimin khan Kolasib-ah MYC Coaching Centre a hawng. He MYC Coaching Centre thar hi Mizorama pathumna a ni a; a hawnna inkhawmah hian MYC chairman Dr Vanlalṭanpuia, MLA chu khualzahawm a ni.