CEO-in SIR 2026-a inziah luhna atan ECINET hmang ṭangkai turin a ngen

Mizoram chief electoral officer (CEO) Garim Gupta chuan nimin khan Aizawl Press Club-ah thuthar thehdarhtute a kâwm a; Electoral Roll Special Intensive Revision (SIR) 2026 neih mekah inziah luhna atan ECINET application hmang ṭangkai turin mipui a ngen.

CEO chuan, SIR 2026 kalpui mekah enumeration form 8,42,312 pek chhuah a nih tawh thu a sawi a, "Hei hi elector/voter awm zat aṭanga 96.26% a ni. Enumeration phase hi May 30 aṭanga June 28, 2026 thleng a ni dawn a, chhianchhiah chinah Mizoramah elector 8,75,068 an awm a, mipa 4,23,397 leh hmeichhia 4,51,671 an ni," a ti.

Enumeration form 8,42,312 sem chhuah tawh a'angin mi 1,67,426 chu chhinchhiah an nih tawh thu sawiin Garim Gupta chuan, "Hei hi 19.13% a ni a, digitized bik chu 1,67,530 niin, hei hi 19.14% a ni," a ti. Enumeration form lak khawm aṭanga chhinchhiah tawh zat aia Enumeration form digitized a tam chhan chu, CEO website leh ECINET kaltlanga online-a inziak lut an awm vang a nih thu a sawi.

Mizoram CEO chuan, ECINET a tam thei ang ber hmang tura Mizoram mipui ngenin, "He app hi Google Playstore leh App Store aṭangin lak (download) theih a ni. ECINET hmanga inziah luh hi a harsa lo a, a tam thei ang ber app-ah hian inziak lut turin kan duh," a ti.

SIR 2026 neih mekah hian booth level officer (BLO)-te'n June 28, 2026 thleng an bial ṭheuhah chhungkaw tin tlawhin enumeration form an sem bakah an la khawm dawn a; July 5, 2026-ah draft electoral roll tihchhuah a ni ang.