MPSC Chairman báng ngam tura thurawn pe turin MSU-in CM ngen

Mizo Students Union chuan, tun hnaiah Mizoram Public Service Commission-in tihsual a neih fo avangin, MPSC Chairman chu báng ngam tura thurawn pe turin chief minister Lalduhoma an ngen.

MSU hruaitute chuan nimin khan CM Lalduhoma a pisaah an hmu a; MPSC-in sorkar hnathawk tur a laknaah buaina a awm fo leh tihsual an nei fo chu ngaihzam har an tih thu an thlen a, "MPSC Chairman hian a hnuaia thawkte a vil ṭha tawk loah kan ngaih vangin báng ngam tura thurawn pe turin kan ngen a ni," an ti.

Chief Minister hnenah hian MSU hruaitute chuan, chanchinbu-ah hnam dang (vai), Mizo hminga official document-a hman tur hming thlak an awm ṭhin thu an sawi a; thil ṭha lo tak a hrin chhuah theih avangin tihtawp a nih theih nana hma la turin an ngen. BSF-a Mizoram quota hnawhkhat tura document dik lo siamtu mi pariat chungchang an thlen bawk.