SIR 2026-a hmalaknate thlir lêt

Election Commission of India (ECI) secretary Binod Kumar leh director Shubhra Saxena te chu Mizorama ni hnih chám turin nimin khan an rawn thleng. Nimin vek khan Planning conference hall-ah Aizawl district-a election official-te nen Mizorama Special Intensive Revision (SIR) of Electoral Roll neih mek thlir letna leh hmalak zel dan turte sawihona hun an hmang.

ECI Director chuan SIR awmzia leh a kalphung a sawifiah a; SIR chu hna hautak leh fimkhur taka kalpui ngai a nih avangin India Constitution-in a sawi ang leh Representation of the People Act, 1950-in a ruat angte chu uluk taka zâwm turin kal khawmte a chah.

Shhubhra Saxena chuan, SIR chu vote nei thei zawng zawngte electoral roll-a telh vek an nih theih nan leh vote nei thei lote paihna tur a nih thu a sawi a; Mizoram chu ramri zau tak nei state a nih avangin ram dang aṭanga dan loa rawn lut (illegal migrants) leh dik lo taka thil tih laka venhimna atan official-te chu fimkhur zawka hma la nasa lehzual turin a chah bawk.

Mizoram chief electoral officer Garim Gupta pawhin thu sawiin, official-te chu thawhhona ṭha leh inpumkhatna nei a, a ṭulna apianga che chhuak tur leh booth level officer (BLO)-te puih an ngaihna apiangah pui zel turin a chah a ni.