Naupang kum 6 hnuai lam enkawlna tur PALNA Anganwadi-cum-Crèche hawng

Social Welfare & Women and Child Development minister Lalrinpuii chuan Secretariat Complex-ah naupang kum 6 hnuai lam, an nu leh pate hna thawka awmte enkawlna tur 'PALNA Anganwadi-cum-Crèche' a hawng.

PALNA Anganwadi-cum-Crèche hi naupang kum 6 hnuai lam enkawlna tura duan a ni a; anganwadi hnai ber nen thlun zawm a ni. PALNA Anganwadi naupangte'n anganwadi dang ang bawkin chawṭha (nutrition) leh hriselna dinhmun enfiah (health check-up) an dawng ve vek dawn a ni.

Minister Lalrinpuii chuan, Secretariat-a hna thawk nu leh pa, a bik takin hmeichhiate'n ngaihngam tak leh hna leh chhungkaw enkawl kawp dan ṭha zawk nei chunga hna an thawh theih nan PALNA Anganwadi-cum-Crèche siam a nih thu a sawi a, "Kum 6 hnuai lam naupangte chu an taksa leh rilru nasa taka a ṭhan lai a nih avangin uluk taka enkawl an ngai a ni," a ti.

PALNA Anganwadi-cum-Crèche kaltlangin naupangte hriselna, ei leh in leh an hmasawnna dan hrang hrang chhinchhiah zel a nih dawn thu sawiin Minister chuan, "He hmun hian nu, hna thawkte phurrit a chhâwk ngei ka ring," a ti a; crèche-a thawktute chu theihtawp chhuah turin a chah.

Social Welfare Minister chuan PALNA Anganwadi-cum-Crèch a hlawhtlin nana thawktute chungah lawmthu sawiin, "He crèche hi Mizoram chhunga department dangte tan pawh entawn tlak a nih ka beisei. Ram hmasawnna tak tak thleng tur chuan naupang leh hmeichhiate dinhmun chawi kan leh ngaihsak thiam a pawimawh hle a ni," a ti.

PALNA Anganwadi-cum-Crèche scheme hi Ministry of Women & Child Development (MoWCD)-in kum 2022-a Mission Shakti (Women Empowerment) hnuaia hna thawktu hmeichhiate tana a duan a ni a; The Maternity Benefit Act, 2017 angin hna thawktu mi 50 aia tam awmna hmunah crèche facility neih ngei tur a nih angin, MoWCD operational guidelines zûlzuiin Secretariat-ah buatsaih a ni.