Hmun pali-ah ruihhlo man a ni

Mizoram Police leh an thawhpuite chuan June 5-7, 2026 inkar khan hmun hrang hrangah ruihhlo eng emaw zat an man.

Police thuchhuah tarlan danin, June 7, Pathianni zing dar 1 vel khan Champhaia police-te leh YMA Sub-Head-quarters ten Chhungte daiah methamphetamine mûm 2,12,100 (kg 23.855) an man.

Police-te hian Rinneihmang (26) s/o Thankipdun, Shadow, Myanmar khalh scooter MZ-01 AB-3317 leh Thangluimang (21) s/o Chawnkipum, Khawmawi, Myanmar khalh scooter MZ-01 R-5168 an dap a, thil dik lo hmuh an nei lo. An indap mek laia kea kal pahnih chu an ûm zui a; Stephen Mangbawithang (20) s/o Kawlzathang, Topila, Myanmar ip (rucksack)-ah meth an man a, pakhat zawk erawh chu a tlanbo hman a, a ip a tlanchhiatsan a ni.

June 4, 2026 zanlai pelh hnu, dar 12:10 khan Vaphaia ruihhlo do pawlte'n Vaphai leh Saikhumphai inkarah Bolero Camper an rinhlelh avangin an tiding a, Dungtlang Police Station an pun a; police-te'n lirthei an dapnaah heroin gram 618 leh methamphetamine kg 4.74 an hmu chhuak a ni. Lirthei khalhtu Chungnawl (41), Singai, Myanmar leh Hmingsangliana (38), Vaphai nia inchhalte an man nghal.

Assam Rifles leh Champhai Police chuan June 5, 2026 zing dar 3 vel khan Zote daiah taxi pakhata chuang Dimsianzovi (32) Champhai Jail Veng nia insawi hnen aṭangin heroin gram 66 an man.

June 5 zan dar 10 vel khan Saitual police-te'n Keifang Kualmawiah truck AS-01 SC-8530 aṭangin heroin gram 427 leh opium fluid nia hriat kg 3.288 an man a; lirtheia chuang Gautam Borah (32) Dohotia, Jorhat, Assam leh Manab Jyoti Dutta (31), Jagduwar Habi Miching, Jorhat, Assam te an man nghal bawk.