LESDE-in PMKVY 3.0 an tlangzarh; PMKVY hmangin Mizo 5,388-in hna hmu

Labour, Employment, Skill Development and Entrepreneurship (LESDE) secretary Dr Lalzirmawia Chhangte chuan nimin khan LESDE pisaah Pradhan Mantri Kaushal Vikas Yojana (PMKVY) 3.0 a tlangzarh. PMKVY hnuaiah hian Mizoramah mi 8,460-in thil an zir tawh a, mi 5,388-in hna an hmu tawh a ni.

PMKVY hi sorkar laipuia Ministry of Skill Development and Entrepreneurship flagship programme a ni a; industry-te'n an mamawh ang thiamna (skill) an hmuh theih nan ṭhalaite zirtirna (training) pekna niin, ṭhalai eng emaw zatin he scheme hmang hian hna an hmu tawh. He scheme-ah hian a ti ṭha ber nih tumin LESDE chuan ṭan a la mek tih an tarlang.

LESDE tarlan danin, PMKVY 1.0 chu kum 2015 khan ṭan a ni a, Ministry hnuaia National Skill Development Corporation (NSDC) hmalaknain kum 2015-16 chhungin India rama ṭhalai nuai 19.85 vel chu thiamthil zirtir (skill training) a ni.

PMKVY 2.0 chu kum 2016-2020 chhungin kalpui leh a ni a, July 15, 2016-ah ṭan a ni. Sorkar laipui leh state sorkarte hmalakna a ni a, 75% chu central kutah awmin, 25% chu state kutah a awm. A thawh hnihnaah hian ram chhunga ṭhalai nuai 94.17 vel (June 20, 2020 thlengin) thiamthil zirtir a ni a, chu'ng zingah chuan Mizoram sorkara LESDE department pawhin Mizo ṭhalai a training tir mi 8,460 telin, an zinga mi 5,388-in hna an hmu tawh.

PMKVY 2.0 hi March 31, 2020-a tàwp tur ni mah se, Covid-19 hripui léng vanga mahni hna thawk chhunzawm thei lote (migrant worker) pualin kum khat pawhsei a ni.

PMKVY 2.0 hnuaia hmalakna chak leh zuala chhunzawm a nih theih nan PMKVY 3.0 ruahman a ni a, phase hniha kalpui tur a ni. Phase khatna chu kum 2020-21 chhunga kalpui tur niin, phase hnihna chu kum 2021-2026 chhungin kalpui a ni ang.

PMKVY 3.0-ah hian PMKVY 2.0 zûlzuiin sorkar laipuiin 75% a chang dawn a, state sorkarin 25% an chang. PMKVY 3.0-ah erawh chuan District Skill Committee (DSC) rawtna angin a theih chin chinah kalpui tur a ni ang. PMKVY hi sum zawng zawng sorkar laipuiin a tum vek a ni.