Cancer enkawlah hma kan sawn zel - Health Minister

Population Based Cancer Registry, Mizoram buatsaihin nimin khan Aijal Club-ah Workshop cum Re-orientation on Cancer Registration and Data Quality hman a ni a; khuallian Health minister Lalrinpuii chuan, cancer enkawlnaah Mizoramin hma a sawn zel thu a sawi.

Health Minister hian Mizoram Population Based Cancer Registry Report (2018-2022) a tlangzarh a; thu sawiin, "PBCR Mizoram hmalakna a ropui hle. PBCR Report hian Mizoram pum huap cancer-a kan dinhmun chiang takin a pho lang. Report-in a hmuh chhuah angin, Mizoramah kum tinin cancer case kan neih belh zel a, chutihrualin, curative treatment leh palliative care lamah pawh hma kan sawn zel a ni," a ti.

JICA (Japan) nen ṭang duna tuna Mizoramin Cancer Hospital changtlung zawk a neih theihna tura hmalaknaah PBCR statistics-in thui takin kawngro a sut thu sawiin Lalrinpuii chuan, "Mizoram PBCR data hi IARC-WHO-in a pawm thlap a ni," a ti a; cancer-in 5 Continents (C1-5) an tihah a zawna vawi 3 - volume IX, X leh XII-ahte lang thei a nihna chuan a rintlakzia a nemngheh thu a sawi.

Khualzahawm Health secretary K Lalrinzuali pawhin thu sawiin, Mizorama doctor-te inpekna leh thawrimna ropui a tih thu a sawi a; hriselna lamah Mizoramin hma a sawn theih nan, duh leh mamawh an neihte sorkara thlen ṭhin turin a chah.

PCBR-in a tarlan danin, Mizoram hi India ramah cancer hluar berna state a ni a, kum 2003 - 2020 chhunga zirchiannaah cancer-ah san lam a pan char char. Mizo mipaah pumpui cancer an tam ber a, hmeichhiaah chuap cancer an tam ber thung.