MZU leh NCHU, Taiwan-in MoU an ziak

Mizoram University (MZU) leh National Chung Hsing University (NCHU), Taiwan-te chuan nimin khan thawhhona thuthlung, Memorandum of Understanding an ziak.

Memorandum of Understanding (MoU) ziah hi online hmanga neih a ni a; MZU aiawhin vice chancellor Prof. KRS Sambasiva Rao-a'n hming a ziak a, NCHU aiawhin president Prof. Dr Fuh-Sheng Shieu chuan hming a ziak a ni.

MoU ziahnaah hian NCHU aṭangin Jonathan Lalremruata leh MZU aṭangin vice chancellor mawhphurhna la mektu Prof. P Rinawma leh registrar Prof. Lalnundanga te bakah, MZU Inter­national Students Center and Collaborations (ISCC) director-te - Prof. HK Laldinpuii Fenate, Dr Lalṭanpuii Ralte leh Dr John Zothanzama te an tel.

NCHU hi Taiwan-a university hlun leh changtlung tak a ni a, Agricultural Sciences-ah khawvela hming lang pha a ni. MoU hian faculty leh staff-teah exchange, student exchange, degree programme neih ho, zirbingna tih ho (joint research), zirna inchhim tawn (joint lecture) leh zirhona (symposium) buatsaihte a tel a ni.