Kum 2020-ah house pass 302 pe

Kum 2020 chhung khan Land Revenue & Settlement (LRS) department-in house pass 302 leh Land Settlement Certificate 102 an pe chhuak.

Nimin khan LRS department chuan an directorate-ah kum thar atana inhlan tharna hun an hmang a; he huna an tarlan danin, kum 2020 chhung khan LRS department-in house pass 302 leh Land Settlement Certificate 102 an pe chhuak a, ram buai (land dispute) 268 chinfel a ni.

LRS department hian nikum khan November 2020 thlengin revenue cheng nuai 1,095.31 an hmu tawh a, registration fee & stamp duty-ah cheng nuai 1,884.81 an hmu tawh bawk.

Inkhawmah hian khuallian Lalruatkima, LRS minister chuan, Revenue department kalphung chu danin uluk takin a phuar tih sawiin, "Department dang nena kal dan inang lo. Chenna in hmun pe chhuaktu kan nih avangin kan mawhphurhna a sang em em a ni," a ti a; mipui rawngbawltu, mipui nena indawr reng an nih avangin hawihâwm tak leh taima taka danin tih leh tih loh tur a sawite zâwm a, mawhphurhna hlen turin thawktute a chah.