Nuai thum sem leh kawng chhâwng Mipui pawhin an sawi peih tawh lo - MPCC Treasurer

Lunglei District Congress Committee (LDCC) chuan nimin khan kumin atan an pisa an hawng a; hawnna inkhawma thu sawitu MPCC treasurer Zodintluanga Ralte chuan, Rs. 3,00,000 sem leh kawngpui chhâwng chungchang chu mipuiin an sawi peih tawh loh thu a sawi.

Zodintluanga Ralte chuan, AMC inthlan leh Serchhip biala by-election neih tur sawiin, "Beiseina sang tak kan nei. AMC leh Serchhip bial by-election-a candidate tur pawh kan nei fel tawh. ZPM hi eng mah tham an ni lo a, inbei tur chu sorkar lai MNF leh keini kan ni," a ti.

AMC chu Congress party siam leh din chhuah a nia sawiin Zodintluanga chuan, "MNF sorkar hian sum siam nan bâk an hmang thiam lo a, tunlai Covid-19 léng karah pawh AMC hi an palzam a, biakràwn pawh an hlawh miah lo. An ngai pawimawh lo hle a ni," a ti a; AMC inthlanah hnehna an chan ngei a ngaih thu a sawi.

MPCC Treasurer chuan, MNF sorkar a pian apiangin ramin harsatna lian tak tak a tâwk zel nia sawiin, "Zoram mipui hian kan ngaihtuah nawn fo a ngai. MNF sorkar apianga hripui, hel, inrûkbo, inthahna, ṭàm, ram pum huap buaina leh sum lama harsatna thleng ziah maite hi a mak hle a ni," a ti.

MNF sorkar chu sum leh pái enkawla hlawhchhamah puhin Zodintluanga chuan, "Congress sorkar lai khan nasa takin kan ramin hma a sawn a, surplus budget nei hial khawpin sorkar leibá kan tihniam a ni," a ti a; Congress sorkar hnutchhiah cheng tam tak chu MNF sorkarin awmze nei loa an hman ral thu a sawi.