Health dept.-a thawk khawpuia insawn duh Tam lutuk chinfel dan kan dap - Health Minister

Health Multipurpose Service Association (HMSA) chuan nimin khan Synod Confe-rence Centre-ah inkhawmpui an hmang a; khuallian Health minister Lal Thanzara chuan, Health department-a thawk, khaw-puia insawn duh tam lutuk chu chinfel a nih theihna atan kawng dap a nih thu a sawi.

Health Minister chuan, Mizoram hmun kilkhâwr apiangah Health department hnathawkte mamawhna a nasa tih sawiin, "Khawpuia insawn duh tam ta lutuk leh damdawi thiam mamawhna Mizoram hmun kilkhawr ber bera awm chho mek hi chinfel a nih theih nan kawng dap mek zel a ni. Hmun kilkhâwr tak taka cheng, hrisel lohna vanga mangangte mamawhna chu Health department-a thawkte hian rawngbawlna rilru nena chhân a ngai a ni," a ti.

Hnaruak hnawhkhah tur rêng rêngah khawtual mite tih tlin hram zel dan sorkarin a zawn mek thu a sawiin Lal Thanzara chuan, "Health department-a thawh chhan chianna nen chuan hmun kilkhawr berah pawh mipui tan rawngbawltu leh missionary a nih theih laiin, khawpuia insawn duh an tam ta deuh hi thawktute'n inenfiah nan hmang se ka duh. Mahni rawngbawlna atana ngai lo tan chuan Health department hnuaia thawh hi thil hrehawm a nih bakah, mipui tana harsatna thlentu nihna niin a lang," a ti a; hna thawh duh nazawngte chu tihdam rawngbawlna hna thawk turin an tlak loh thu a sawi.

Health Minister chuan, phaiah mihring 5,000 tan sub-centre pakhat leh tlangramah mi 3,000 tan sub centre pakhat tâwk anga ngaih a nih laiin, Mizoramah chuan sub-centre pakhat chu mi 3,000 aia tlemin an inṭâwm tih a sawi a, "Inpekna thar nen thawktuten ṭan an lak phawt chuan Mizoramin hriselna kawngah nasa takin hma a sawn thei a ni," a ti.

HMSA inkhawmpui hi an president P Manliana'n a kaihruai a; an hmachhawpte an sawiho bakah, an hnathawhna atana ṭul hrang hrangah an infuih a ni.