Lungleiah Covid-19 vaccine sawipui

Lunglei chief medical officer (CMO) Dr LC Liana chuan nimin khan a pisah thuthar thehdarhtute a kâwm a, Covid-19 laka invenna damdawi (vaccine) pek chhuah tur chungchang sawipuiin, Lunglei district-a vaccine pek turah inpuahchah zawh a nih tawh thu a sawi.

Dr LC Liana chuan, "Covishield vaccine dose 1,250 nimin khan a lo thleng a, vaccine pek thawh khatnaah Lungleiah mi 100 hnenah Lunglei Civil Hospital aṭangin pek ṭan a ni ang," a ti. Covid-19 vaccine dawng tur hian Lunglei district-ah healthcare worker 2,050 ziah luh tawh a ni.