Lottery-a cheng nuai 11808.77 hlohnaa Mawhphurtu berah MNF-in CM an puh

MNF party chuan chief minister Lal Thanhawla chu kum 2012-13 aṭanga 2014-15 chhunga lottery aṭanga Mizoram sorkarin sum hmuh theih tur cheng nuai 11808.77 a hloh chungchanga mawhphurtu berah an puh.

Lottery kalpuitu thlan danah thil dik lo a awm ngei nia ngaiin, tuna Mizorama lottery kalpui mektu firm palite term tihtawpsak turin sorkar an phût.

MNF vice president leh MNF Vigilance Committee-a chairman R Tlanghmingthanga chuan nimin khan Mizo Hnam Rûnah thuthar thehdarhtute a kâwm a; CAG Audit Report 2016 report-a a lan danin, kum 2012-13 - 2014-15 chhungin Mizoram sorkar sum báwma lut tur cheng nuai 11808.77 chu lut loin, hnam dang company-te kutah a lut vek niin a sawi a, "Rs. 25,45,00,000 chauh Mizoram sum báwmah a lut a. Hei hi Lottery Regulations Rules 2010 kalh tlat a ni," a ti.

R Tlanghmingthanga chuan, "Mizoram kum khat budget aia tam zawk Lottery Scam a lo awm ta hi Congress-in sorkarna an lak kum 2008 aṭanga inṭan a ni a, he thilah hian CM Pu lal Thanhawla a inrawlh nasa hle," a ti a; Lottery Scam chu ram tana pawi khawihna leh sorkar tan hlohna nasa tak a nih thu a sawi.

R Tlanghmingthanga chuan, CAG Audit Report 2016-a lang, Mizoram sorkarin sum tam tak a hlohnaah Lal Thanhawla'n mawh a phur ngei tih sawiin, dik lo tak leh sum tlemtê Mizoram sorkara chhung lut chunga Mizorama lottery kalpuitute tender chhuah awm loin ṭum hnih, kum 2018 thleng a pawhseisak mek tih a sawi.

Mizoram Lottery Scam chu UPA sorkar laia 2G Scam, Coal Scam, Chopper Scam-te nen a kalhmang a inang nia sawiin, Tlanghmingthanga chuan, "Duhsak bikte nena sam inphiar zawm vanga sorkar sum hlohna vek a ni," a ti. Mizoram sorkarin tuna lottery kalpui mektu firm palite term, tender chhuah thar awm loa a vawi hnihna atana a pawhsei mek (May 29, 2015 - May 28, 2018) chu a rang thei ang bera titawp tura an phût thu a sawi bawk.

Zawhna chhangin MNF Vice President chuan, firm palite term ṭum hnih pawhsei chhan a awm a nih chuan mipui hriatah puanzar an phût tih a sawi a, "CBI chhuitir ṭha kan ti a, mahse, a ko lut theitu kan ni lo. CBI kan ko lut ngam ti rengtu a ni a, an dikzia tichiangtu atan a ko lut ngam mahna," a ti.

MNF Vice President Press Statement

θ Lottery selling agent/distributor firm 10 velin tluang taka lottery an kalpui laiin, kum 2009-ah re-modelled financial structure duan hnan a ni a, firm-te term a tawp hmain January 29, 2010-ah sorkarin tender a chhuah hnan.

θ Lottery kalpui mektu firm-te chuan Mizoram sorkar thil tih dan chu duh loin Court-ah sorkar an khing. March 18, 2010-ah Mizoram sorkarin lottery a titawp vek. (Vide No. G.16010/43/2010-F.IF&SL Dated 18th. March, 2010).

θ Sorkar thupek (Vide No. G.16010/43/2010-F.IF&SL Dated 18th. March, 2010) chu sût si loin December 13, 2010-ah tender chhuah a ni a, a hnu lawkah sût leh a ni. March 9, 2011-ah tender thar chhuah leh a ni a, tender-ah a hmaa phût ṭhin 'No due certificate' phût tel a ni lo. Chutih laiin, tender chhangtu leh lottery kalpui tura thlan tâk zinga mi NV International-in Mizoram sorkarah leibá cheng nuai 143 a nei.

θ NV International hian online lottery kalpui tura thil ṭul a nei lo tih CAG Audit Report-ah tarlan a ni.

θ April 1997-ah UP sorkarin an state chhungah Mizoram lottery hralh a khap avangin NV International-in Mizoram sorkarah zangnadawmna Rs. 4,30,00,000 a phût. Mizoram sorkar pawhin NV International lakah agreement bawhchhiat vangin Rs. 2,04,54,64,471 a phût let ve bawk. Hei hi thubuai, Arbitration case no. 1 of 2003 kalpui zui a ni a, MNF sorkar laiin Justice HKK SIngh-a Court-ah hearing neih ṭhin a ni. Congress party sorkar hnu, January 2011-ah case chu Mizoram sorkarin a tihtawpsak a, NV International-in zangnadawmna a phût pawh pek tura remtih a ni.

θ March 9, 2011-a tender chhuah chu firm 13-in an chhang. Van Hela Pachuau kaihhruai STate Lottery COmmittee-in April 28, 2011-ah lottery kalpui tur firm pathum an thlang. Mahse, firm ṭhenkhatin Court-ah an khin avangin August 8, 2011-ah 'stay' a ni. August 25, 2011-ah Gauhati High Court-in interim order a tichhuak a, Mizoram sorkar chu lottery agent/distributor thlan a phalsak a, mahse, thubuai awm chhung chu lottery kalpui rih lo turin a hriattir. Final judgement siam hmain CM Llal Thanhawla'n tender chu withdraw turin September 26, 2011-ah a ti.

θ Sorkarin December 20, 2011-ah tender thar a chhuah leh a, tender chu CM Lal Thanhawla duhsakna dawngtu firm paliin chhan theihna hniam ber vekin an chhang. March 9, 2011-a tender chhuah chhangtu dang pakuate'n an chhang duh tawh lo. Tender chhangtute chu - online-ah NV International, Summit Online Trade Solutions leh E-Cool Gaming Solutions leh, paper-ah Teesta Distrubutors-te an ni a; Rs. 10,000 vekin an chháng.

θ State Lottery COmmittee-in May 18, 2012-ah online lottery-a tender chhangtu pathumte chu an thlang vek a, paper lottery leh bumper lottery-ah erawh chhangtu pakhat chauh a nih avangin tender chhuah nawn an rawt. Mahse, State Lottery Committee-in re-tender a rawtna chu CM-in a hnâwl a; file-ah pawh, 'I am sorry, I do not accept the recommendation of Lottery Committee...' tiin a ziak.

θ Firm paliin a hniam thei ang ber leh inzat veka tender an chhang hi thil ni thei lo, awm ngai lo leh rinhlelhawm tàwpkhâwk a ni. Competition Commission of India (CCI)-ah thubuai a lut a, CCI chuan Supreme Court-ah a thlen a (case no. 820-108222014), thubuai a la kal mek.