KHAWTHLIR

Thisen pe

Champhaia GM Higher Secondary School NSS-te chuan, nimin khan Champhai District Hospi­tal tan thisen unit 53 an pe a, a petute mipa 28 leh hmeichhia 25 an ni. KABOD Computer Institute-te pawhin nimin khan Aizawl Civil Hospital tan thisen unit 24 an pe a, a petute mipa 21 leh hmeichhia pathum an ni.

Lirthei dah khap

Traffic SP chuan thupek chhuahin, Bawngkawn leh Ṭhuampui inkar kawngpui siamṭhat hna thawh mek a khailak lohna atan, kawngpui sir tawn tawnah lirthei dah khap a nih thu a puang.

Pension hlawh MRB-ah lak theih

Finance department chuan office memorandum tichhuakin, sorkar hnathawk pension tawh, Treasury kaltlanga SBI-a pension hlawh la ṭhin, Mizoram Rural Bank (MRB)-a pension hlawh la duh zawkte tan January 2017 hlawh aṭangin MRB aṭangin lak theih a ni dawn tih an tarlang. Hlawh lakna sawn duhte chuan Treasury an dawr ṭhinah document pawimawh thehluh tur a ni.

MBA-in tanpui

Mizoram Bar Association (MBA) chuan, nimin khan Krismas pualin home leh ṭanpui ngai mi hrang hrang hnenah thilpek an hlan. Thilpek an hlante chu - buhfai, alu, dâl, tél leh pawisain an sem a, an sem ral zawng zawng hi Rs. 2,30,000 hû a ni.

Mamitah Judge

Gauhati High Court leh Mizoram Potfolio judge, Justice Michael Zothankhuma chuan, nimin khan Mamit a tlawh a, judicial officer quarters tur sakna tur hmunhma leh Mamit District Court-a an thil man khawm sa dahna (Malkhana) a enfiah. Judge chuan, Mamit DC leh SP hnenah Mamit District Court leh malkhana-ahte police duty tir turin a ngen a ni.

NULM thlirho

National Urban Livelihood Mission (NULM) hnuaia City Level Executive Committee for Lunglei Town chu nimin khan Lunglei DC Lalzarmawii hoin DC conference hall-ah an
ṭhukhawm a, NULM hnuaia hmalakna leh hmachhawpte an thlirho.