Sum hi a zawna zawn hmuh tur ni loin Thawh chhuah tur a ni - CM Hawla

Chief minister Lal Thanhawla chuan, thawhrimna leh taimakna a pawimawh tih sawiin, "Sum hi a zawna zawn hmuh tur ni loin, a thawha thawh chhuah tur a ni," a ti.

December 13, 2016-a Serchhip Zawlpui, Mat lui kama nûl siamtu intélkhawm, Serchhip Agriculture & Horticulture Farmers Cooperative Society-te inhman ṭâwm tur tractor pahnih a hlannaah Chief Minister chuan, "Ringtu Zofate hi mahni kutkea kan thawh chhuaha kan intodelh a pawimawh," a ti a; dikna leh takna nena hna thawh a nih chuan Pathian malsawmna an dawn tur thu a sawi.

Lal Thanhawla chuan, leilung fate'n nihna leh mawhphurhna inchen vek an neih thu sawiin, "Kan zavaiin a chhe lai siam ṭha tura koh kan ni tih kan hriat leh kan pawm a ṭul. Eng hna pawh thawk ila, rinawmna, dikna leh taimakna nen kan thawh a ṭul," a ti.

CM Hawla chuan NLUP hlawhtlinna zîktluak chu a dawngtute kutah a innghat tih sawiin, "Kum 20 chhung rambuai vangin eizawnna kawngah mi tam zawkte'n lei rem an rap lo a, NLUP hmangin rahbi tleu tawhte rahbi tuksak an ni," a ti a; NLUP dawngtute chu hlawhtling ngei tura theihtawp chhuah turin a chah.

Mat kam leh Serchhip Zawl-puia kut hnathawktute'n an thawhrimna aṭanga hlawhtlinna an hmu mek chu a lawmpui thu sawiin Chief Minister chuan, "Khawl in dawn thar hmang hian nasa zawka hlawhtlinna a pun a, malsawmna in dawn belh ka beisei," a ti.

Horticulture minister PC Lalthanliana chuan, khârchâwng vangin kut hnathawktute'n an hlâwkna tura ang an tél lo tih sawiin, "Society leh market inzawm ṭha tak neihin hlâwkna tam zawk kut hnathawktute kutah a lut thei a ni," a ti a; society member-te chu kalphung felfai tak nei chunga kal turin a chah.

CM-in tractor pahnih a hlante hi Tata Trusts hnuaia North East Initiative Development Agency (NEIDA)-te pek a ni a, lei lehna pahnih - rotovator leh cultivator a awm bakah, thlai thar chhuah phurhna tur trailer a chhawm tel.

NEIDA leh Horticulture department chuan July, 2016 khan thawhhona thuthlung an ziak a; MoU ang chuan, district pathum - Aizawl, Lunglei leh Serchhipahte serthlum, purûn sen, zîkhlûm leh balhla chingtu leh kut hnathawktute hmalak puiin, kawng hrang hrangin department nen ṭang dunin an ṭanpui dawn. Chuta tan chuan cheng nuai 150 ruahman a ni.