Good Governance Day hman loh tur thu puang turin BJP-in Chief Minister an phût

BJP Mizoram Pra-desh chuan thuchhuah siamin, sorkar lai-puiin December 25-a Good Governance Day hman tura a tih chu Mizoramah hmang turin a phût lui ngai lo niin an tarlang a; Mizoramah Good Governance Day hman a nih dawn loh thu sawi chhuak ve tur-in chief minister Lal Thanhawla an phût.

Mizoram BJP chuan, sorkar laipuiin kum 2014 aṭanga December 25, Good Governance Day atana a puan hnuah Mizoramah Good Governance Day hman a la ni ngai lo tih sawiin, "Central sorkarin hemi nía Good Governance Day hmang turin min phût lui ngai lo. Good Governance Day hman hi state sorkar thuneihna a nih avangin Mizoramah hman a la ni ngai lo," an ti.

BJP chuan, sorkar laipuiin Good Governance Day atana December 25 a puan chhan chu, Kristiante ni pawimawh tihbawrhbân tumna vang ni loin, prime minister hlui Atal Behari Vajpayee pian champha a nih vang-a amah chawimawina leh sorkar ṭha a awm theihna atan a nih thu an sawi a; Good Governance Day puan vangin Mizo mipui-te zahlohna leh hmuhsitna a awm loh thu leh Mizo mipui tan hlauhawm a awm loh thu an sawi a ni.

Mizoram BJP chuan, Goa CM Laxmikant Parsekar, BJP mi leh sa chuan December 25 chu Kristiante ni pawimawh bik a nih avangin an state chhungah December 25-a Good Governance Day an hman dawn loh thu a puang tih an sawi a; Mizoram Chief Minister pawh December 25-ah Mizoramah Good Governance Day hman a nih dawn loh thu sawi chhuak turin an phût a ni.