Court thupek angin zirtirtute dah lêt

Mamit district-a zirtirtute zinga eng emaw zat district danga dah an nih vanga High Court-a PIL thehluh a nih hnuah, High Court thu angin Mizoram sorkar chuan district danga a dah zirtirtute chu Mamit district-ah a dah lêt.

Mamit district-a PRISM-in nimina thuchhuah an siama an tarlan danin, Mamit district-a SSA hnuaia zirtirtu 42 chu Aizawl district leh Kolasib district-ah awmtir an ni a; Mamit district-ah zirtirtu indaih loh nasat phah a, mipui an phun nasa a ni. Chuvang chuan PRISM, Mamit district chuan Gauhati High Court, Aizawl Bench-ah zirtirtute an awmnaa dah lêt a nih theih nan PIL an thehlut a ni.

Gauhati High Court chuan Mamit district-a zirtirtute chu an post pang-ngaia dah lêt turin Mizoram sorkar a hriattir a; Mizoram sorkar pawhin June 24, 2016-ah zirtirtu dah letna thupek a chhuah. Mizoram sorkarin zirtirtute a dah lêt tak avangin High Court pawhin December 12 khan thubuai a titawp a ni.

Mamit district PRISM chuan, a hmalakna a hlawhtling ta chu lawmawm an tih thu an sawi a; Mamit district chhunga sorkar hnathawk awm ṭha duh lo te, hna thawhnaa ti ṭha duh lote leh mipui chan ái pawhpên chíngte chu an do zel dawn tih an puang bawk.