Kum 2020-a lirnghing zirho

Directorate of Science & Technology chuan nimin khan Aijal Club-ah kum 2020 chhunga Mizoram hmun hrang hranga lirnghing chungchang zirchianna, ‘2020 Earthquakes in Mizoram Seminar' an buatsaih a; Planning secretary Dr C Vanlalramsanga'n a hmanpui.

Dr C Vanlalramsanga chuan, kum 2020 chhungin Mizoram hmun hrang hrangah lìr a nghîng a, Mizoram khawchhak lamah a nghing na zual tih sawiin, "Thil a tihchhiat bakah mipui nunphung a tibuai hle. Khuarel chhiatna hi pumpelh theih ni lo mah se, mi thiam bikte ruahmannain invèn theih a ni," a ti.

Seminar hi chief scientific officer Dr RK Lallianthanga’n a kaihruai a; leilung chanchin zirmi, khuarel chhiatna chungchanga mithiam leh engineer - college, university leh sorkar department aṭanga thlante'n an sawiho a ni.