Sorkar laipui kal zel dan tur enin râlkhèl dár a rì - Lalduhoma, MLA

28th January, 2020

Lalduhoma, MLA chuan nimin khan ZPM pisaa inkhawmah thu sawiin, sorkar laipui kal zel dan tur enin, rálkhèl dár a rì tih a sawi a, "Inrálrin a hun tak zet a ni tih hi a chiang khawp mai," a ti.

BJP kaihhruai sorkar laipui chu India ram economy chawisan aia BJP party sawhngheh leh tihhausak tum zawk an nia sawiin Lalduhoma chuan, "Company liante nen ṭangrualin an intilâwm tawn a, corporate tax nasa takin an tihniam a, electoral bond kawngka zau takin an hawng thung," a ti a; kum 2018-19 chhungin BJP-in an party tan cheng vbc. 1,450 an neih hman thu leh tunah chuan a tam leh zual tawh tur thu a sawi.

Lalduhoma chuan, India ram economy a tlachhe mek tih sawiin, "Revenue nasa takin a tlahniam a, growth rate-ah Bangladesh pawh kan phâk ta lo. Kum 45 chhunga unemployment rate (hna thawh tur nei lo) san ber kumah min hnûk lut mek. Delhi tlanga budget lipui, khawh lut pur pur, liam zur zur chu thàl tur awm loin a kang chat mek a ni," a ti.

BJP sorkar rorel duh dan chu mi dangte awpbet zawng hlir a nih thu sawiin Duhoma chuan, "RTI Act leh UAPA (Unlawful Activities Prevention Act) an siam danglam a, mimal pawh terrorist-a puan theih a nih bakah, media-te pawh an chêp sâwt hle. Article 370 an paih a, Armed Forces Special Power Act (AFSPA) Nagaland-ah an puang a, disturbed area-ah an dah a ni," a ti a; BJP sorkarin an tih leh tur chu - Uniform Civil Code, Ram Mandir sak leh sakhaw danga inleh khapna (anti-conversion law) siamte a nih thu a sawi.

Lalduhoma chuan, Mizote ram, hnam, sakhua humhalh ngam sorkar ṭha Mizoramin a neih a ngai tak zet tih sawiin, "Kan rama rorel lai party-in kan hnam him lohna tur an thláwp tlat mai hi a vanduaithlak a, kan MP hi a mimalin kan dem lo. A vote tirtu party hi kan dem zawk a ni. Rálkhel dár a rî a, inrálrin a hun tak zet a ni," a ti.MC Mary Kom-i'n Padma Vibushan, C Kamlova'n Padma Shri (Literature and Education) leh Lalbiakthanga Pachuau-in Padma Shri (Literature and Education-Journalism) an dawng chu a lawmpui thu Lalduhoma chuan a sawi bawk.