Saisihchhuah lei dawhna atan US dollar vbc. 200 ruahman a ni

State Planning Board vice chairman H Rammawi chuan Saisihchhuaha lei dawhna atan India sorkarin US dollar vbc. 200 (billion hnih) Myanmar sorkar hnenah a pek thu a sawi.

Nimina a pisaa thuthar thehdarhtute a kawmnaah H Rammawi chuan, Saisihchhuaha lei dawh chu Zo hnahthlak insuihkhawmna atan a pawimawh avangin MNF-in sorkarna an chan hnuah an ngaih pawimawh thu a sawi a, "Saisihchhuah piah lam Myanmar ram chin hi an vice president Vanṭhiauva bial a ni a, anni hian an sorkarin lei dawh se a chak zawk a rin thu a sawi a, keini pawhin Myanmar lamin dawh se a chak zawk kan rin avangin hma kan la a ni," a ti.

H Rammawi chuan, Myanmar sorkarin lei an dawh theih nan chief minister Zoramthanga nen Ministry of External Affairs an dawr thu sawiin, "Agreement-ah lei dawh hi India sorkar lam chan a nih avangin MEA chuan Myanmar lamin dawh mai an duh thu an rawn thlen chuan agreement tihdanglam ngai kher loin an dawh mai theih thuin min chháng a, chuvangin hmalak nghal a ni," a ti a; India sorkarin sum a pek hnuah Myanmar lamin lei dawh turin survey an tih nghal thu a sawi.

H Rammawi sawi danin, Saisihchhuah lei dawh zawh a nih hunah chuan Myanmar-a Zo hnahthlakte leh Mizorama chêngte awlsam zawka intlawhpawh theih a ni dawn. Hetih lai hian, Mizoram chhungah Pangkhua aṭanga Saisihchhuah chu kawng a la ṭha lo a, Pik-up an kal thei ṭawng ṭawng a ni. Pangkhua leh Saisihchhuah inkar chu km. 6-7 vela thui a ni.