The Citizenship (Amendment) Bill, 2016 dodalna Hmarchhakah total bandh
North East Student Organisation (NESO) bul tumin nimin khan India hmarchhak state hrang hrangah The Citizenship (Amendment) Bill, 2016 duh loh lantirna leh dodalna lantirna atan total bandh huaihawt a ni a; Mizoramah pawh MZP-in zing dar 5 aṭanga tlai dar 4 thleng total bandh an huaihawt.
Total bandh-ah hian zing dar 5 aṭangin MZP member-te chu hmun hrang hrangah an duty ṭan a, bandh-in a huam ve lohte leh phalna neite bâk veivâk hmuh tur an awm lo. Sorkar pisa, zirna-in te, dawr leh sumdawnna hmunte khar vek a ni a; bandh vanga harsatna lian tham thleng a awm hriat a ni lo. Mizorama lirthei lut turte pawh dan a ni.
Bandh hi NESO bultumin India hmarchhak state tinah huaihawt a nih angin, a ṭan hun leh tihtawp hun pawh a rualkhai thei ang bera tih a ni a; Mizoram bakah, hmarchhak state hrang hrangah a rualin nimin tlai dar 4 khan bandh chu tihtawp a ni.
Nimin chawhnu dar 1:30 khan Aizawl Head Post Office, Treasury Square bulah MZP chuan The Citizenship (Amendment) Bill, 2016 copy an hâl a; MZP president L Ramdinliana Renthlei-in a dep kai.
L Ramdinliana Renthlei chuan, The Citizenship (Amendment) Bill, 2016 chu Parliament-a pass a nih chuan Mizo mipuite tan a hlauhawm lehzual thu a sawi a, "A bik takin Bangladesh aṭanga lo lut Chakma-te saw automatic-in India khua leh tui an nih theih nghal dawn avangin Mizoram mipui tan a hlauhawm zual a ni," a ti.
MZP President chuan, Bill chu Mizote tana a hlauhawm zualna dang chu - Kristianna nêkchêp theitu bill a nih vang a nih thu a sawi a, "He Bill hian a tum pakhat nia kan han hriat chu, India ramah Hindu lal ram din tumna a ni a, hei hi a hlauhawm zualna a ni," tiin, Hindu lal rama India ram siam chu an duh loh thu a sawi.
L Ramdinliana Renthlei chuan, The Citizenship (Amendment) Bill zir chiangtu tura din, Joint Parliamentary Committee-in hmarchhak state-te an tlawh mumal lo tih sawiin, "Mizoram phei chu an rawn tlawh lo. Hetianga report an thehlut mai hi a hmarchhak ang pawhin kan hrethiam lo a, hmarchhak hi India ram state-ah min ngai lo em ni tih hi MZP zawhna a ni," a ti.
The Citizenship (Amendment) Bill chu Mizo mipuite ráwn miah lo leh Mizoram tlawh miah loa pass a nih chuan Mizo ṭhalaite'n an tih tur an hre tura a ngaih thu sawiin Ramdinliana chuan, "Hmarchhak ang pawhin kan ṭangrual khawp a, Bill hi pass luih a nih chuan hmarchhak hi nasa taka a buai kan ring," a ti a; Bill pass a nih lohna atan theihtawpa hmalak a nih dawn thu a sawi.
MZP President chuan, total bandh huaihawttu chu MZP ni mah se, a tihhlawhtlingtu chu an tlawmngai pawlpuite leh mipui an nih thu sawiin, "Min ṭawiawmna kan hmuh zawng zawngah kan lawm tak zet a, total bandh hlawhtlinna atana thawktu zawng zawngte hnenah lawmthu kan sawi a ni," a ti bawk.