Budget siam hmasak berah SEDP atan pawisa dah a ni ang - Dr R Lalthangliana
MNF policy Socio-Economic Development Policy (SEDP) duangtu committee-a chairman Dr R Lalthangliana, minister, MNF vice president ni bawk chuan, MNF sorkarin budget a siam hmasak berah SEDP atan sum dah a nih tur thu a sawi.
Vanglaini palai zawhna chhangin Dr R Lalthangliana chuan, Congress sorkarin an policy NLUP atan budget-ah kum hnih hnuah sum an dah chauh thu a sawi a, "Kei ni chuan kan policy atan hian hun kan khawhral ve ka ring lo. Budget session neih hmasak berah SEDP atan pawisa kan dah ngeiin ka ring," a ti.
Dr R Lalthangliana chuan, SEDP kalpui ṭan dan tur chu chief minister Zoramthanga hoa an la sawiho tur thu sawiin, "Hna thawh ṭan dan tur leh thil pawimawh dang hrang hrangte chu Chief Minister hoin kan la sawiho ang. Ministry din aṭangin hun a la rei lo a, hmalakna hun tak tak a la awm lo," a ti a; remchang hmasaah SEDP chungchang chu CM hoa an sawiho a rin thu a sawi.
SEDP-in a huam zauh thu sawiin Dr R Lalthangliana chuan, "Mite eizawnna tur mai bakah, kawngpui sial, health care scheme, etc. a huam vek a ni. SEDP-ah hian bul ṭan nghal vat tur te, tih vat vat chite leh hun awh deuh hnua hlawhtling tur chite a awm a ni," a ti.