February aṭangin TV fee a danglam dawn Fee chawi mek zat aiin a sang zawk dawn?

Sorkar laipuia cable television kaihhnawiha thuneitu sang, Telecom Regulatory Authority of India (TRAI) thupek angin, kumin 2019 February thla cable TV fee khawn aṭangin monthly fee lak dan kalphung tihdanglam a ni dawn.

Fee lak dan thar ang chuan, Mizote'n TV channel an en ṭhin aṭanga chhûtin, tuna fee chawi aia tam zawk, a lêt aia tam mah chawi a ngaih a rinawm nia thu dawn a ni.

TRAI hi sorkar laipuia Ministry of Information and Broadcasting hnuaia mi a ni a, cable TV chung­changa thuneitu sang a ni. TRAI hian cable TV subscriber-te'n langtlang taka an duh ang channel an thlan theihna turin cable TV monthly fee lak dan thar, New Regulatory Framework for Broad­casting and Cable Services an duang a; chu chu New Tariff Order (NTO) tia sawi a ni bawk.

New Regulatory Framework for Broadcasting and Cable Ser­vices hi December 29, 2018 aṭanga hman ṭan tura tih ni mah se, India ram pumah mipuite'n a kalphung an la hriat mumal loh avangin a hman ṭan hun tur hi sawn hlat a ni a; February 2019 thla fee khawn aṭanga hman ṭan tura tih a ni ta zawk a ni.

Cable TV monthly fee lak dan thar, NTO hnuaiah hian pay channel zawng zawngah a man, maximum retail price (MRP) tarlan vek tawh tur a ni a, cable TV operator-te'n an duh ang channel a hlâwma subscriber-te hnena pe chhuak tawh loin, subscriber tinin an channel duh zawng an thlang ang.

Channel hrang hrangte chu ṭhen hran a ni dawn a, hlâwm hrang hrangah siam tur niin, chu chu package tih a ni. Subscriber-te'n an duh channel awmna package an thlang tawh dawn a, package-a awm lo, channel an duh site chu a mal malin subscriber-te'n an thlang dawn a ni. Hei vang hian TV monthly fee pawh channel lak azirin a inang dawn lo a, subscriber-te fee chawi zat a inang dawn lo tihna a ni.

Kalphung thar anga February thla aṭanga TV fee khawn/pe tur hian cable TV operator-te'n tun January thla chhung hian subscriber tinte chu an channel duh zawng an thlantir vek dawn a; February 2019 fee khawn aṭangin kalphung thar chu hman ṭan a ni ang.

Aizawla cable TV distributor pakhat chuan, ZONET Cable TV emaw, LPS Vision emaw pawh ni se, operator-te'n tuna a hlâwma channel an pek chhuah zawng zawngah hian subscriber-te'n Rs. 350 leh Rs. 400 an chawi tlangpui tih Vanglaini palai a hrilh a; cable TV monthly fee chawi dan kalphung thar hnuaiah erawh chuan, tuna Mizo mipui hnena channel pek chhuah zawng zawngah hian Rs. 800 - Rs. 1,000 inkar chawi a ngai tih a sawi.

Cable TV distributor pakhat chuan, subscriber-te'n channel an duh ang zawng thlangin an lei theih tawh dawn rualin, channel-te chu package-a ṭhen a nih avangin channel duh ang lei rualin, duh vak loh pawh a tel a ṭul dawn tih a sawi a; Mizo chhungkaw pangngaia mite'n channel an en tlangpuiah a tlem lama chhût pawhin, thla khatah Rs. 600 - 800 vel tal chu thla khata TV fee-ah an chawi a ngaih a rinawm thu a sawi bawk.