Khuh damdawi laka ṭhalaite vên dan tur rêl

Excise & Narcotics minister Lalnghinglova Hmar hoin nimin khan a pisaah Excise & Narcotics department (END), Home department, Food & Drugs Administration (FDA) hotute leh Central YMA hruaitute'n tun hnaia ṭhalai zinga khuh damdawi hluar chho meka hmalak dan tur an rêl.

Lalnghinglova Hmar chuan, tun hnaiah ṭhalai zingah khuh damdawi ruih a hluar thu sawiin, "Ngaimawhawm tak a ni. Khuh damdawi hi naupang zawkte'n zu leh damdawi dang an khawihna kailâwn a ni a, ruihhlo dang leh damdawi hlauhawm tak tak kan vei rualin, khuh damdawi zalen lutuk hi engtinnge kan tihreh theih ang tih kan ngaihtuah a ngai. Mizoram pawnah khuahkhirh a nih laia Mizorama a zalen em em hi thil nih dan tur a ni lo," a ti.

Ṭhutkhawmah hian report hrang hrang ngaihthlak a ni a, tun hnaiah ṭhalai zingah khuh damdawi ruih a hluar thu sawi a ni. Naupang aṭanga sakhaw rawngbawltu thlenga a nghawng avangin hmalak thuai a ṭul thu an sawi.

Khuh damdawi a hluar dan leh chumiin harsatna a thlen te, hma la tura dan tlawhchhan theihte zir chianna mumal tak neih ni se, an ti a; harsatna hrang hrang bakah chingfel tura hmalak dan turte an buatsaih. Mapping mumal tak ti turin Home department, END, FDA leh CYMA aiawh pakhat ṭheuh ruat an ni. Zirchiannate chu ṭhutkhawm leh hunah thlirho a, hmalak chhunzawm dan tur ngaihtuah a ni ang.

Damdawi zuarte hnenah doctor chawh (prescription) tel loa khuh damdawi hralh lo tura ngenna siam chu CYMA kutah an dah a; YMA branch tin huam chhunga damdawi dawrte inhriattir tura ngen ni se, an ti.

Hmalak chhunzawm dan ngaihtuah turin a rang lama ṭhutkhawm leh an rêl a; ṭhutkhawm leh hunah Social Welfare & Tribal Affairs department bakah, Mizoram Chemist and Druggist Association aiawhte sawm ni se an ti bawk.