MP (RS) nih tuma hming pek luhte pawm ve ve a ni

June 18, 2026-a Mizoram aṭanga Member of Parliament, Rajya Sabha (MP) thlanna chuh tura hming pek luhte chu nimin khan endik a ni a; hming pe lut pahnih - ZPM candidate K Laltluangkima leh MNF candidate Zothansangi Hmar te chu pawm ve ve an ni.

Rajya Sabha MP nih tuma hming pe lutte nomination paper-te chu nimin khan returning officer Zothansanga Ralte, Assembly secretary hoin endik a ni a; fel lo a awm loh avangin pawm ve ve an ni.

MP (RS) thlan turah hian June 11, 2026 thleng inhnuhdawhna hun hawn a ni dawn a; June 18, 2026 (Ningani) zing dar 9 aṭanga tlai dar 4 thleng vote thlakna hun hawn a ni ang a, vote thlak ní tlai dar 5-ah vote chhiar nghal a ni ang.

Mizoram Rajya Sabha inthlanah hian MLA-te'n vote an thlak dawn a; tuna political party-te'n MLA an neih zat chu - ZPM-in 27, MNF-in 10, BJP-in pahnih leh Congress party-in pakhat a ni. Mizoram MLA-te vote hlutna (vote value) chu 100 zel a ni a, tling tura vote hmuh ngai zat chu 2,100 (MLA 21) a nia sawi a ni.