KHAWTHLIR

YMA-in thisen pe

Sertlangpui Branch YMA chuan nimin khan an hall-ah thisen pek an huaihawt a, Lunglei Civil Hospital tan thisen unit 34 an pe a, petute mipa 28 leh hmeichhia paruk an ni.

MBSE-in result tichhuak dawn

Mizoram Board of School Education chuan vawiin chhun dar 12:30 hian kumin HSLC leh HSSLC Compartmental exam leh Improvement exam result a tichhuak dawn. Result hi MBSE Office, Chaltlang leh MBSE Regional Office, Lunglei bakah www.mbse.in leh www.mbseonline.com ahte en theih a ni ang.

AR-in pistol man

Assam Rifles chuan June 8, Thawhṭanni khan Champhai Zote-ah Dr Thomas Lalliana (55) s/o Thangliana (L) nia inchhál hnen aṭangin Italy siam 0.32 Beretta pistol pakhat, magazine leh a mu pathum an man. Lalliana lakah hian Champhai Police Station-ah thubuai ziah luh a ni.

Er & Arch. Meet

Pidilite Industries chuan nimin khan Hotel Regency conference hall-ah engineer-te leh architect-te pualin inhmuhkhawmna, Engineers & Architects’ Meet an buatsaih a, engineer leh architech eng emaw zat an tel. Khuallian Vishal Malhan, chief business officer, Emerging India, Pidilite Industries chuan Pidilite thil siam chhuahte leh in sak leh design chungchangte a sawi a; zawhna leh chhanna hun hman a ni bawk.

Ran enkawl zirtir

AH&Vety department, Mizoram State Rural Livelihood Mission leh State Institute of Rural Development & Panchayati Raj te chuan SIRDPR hmunah ran hriselna enkawl thei tura hmeichhiate zirtirna Accredited Agent for Health and Extension of Livestock Production (A-HELP) training vawi 10-na an ṭan. Training hi ni 17 chhung awh tur a ni a, hmeichhia 50 telin, mithiamte'n hrisel taka ran enkawl dan an zirtir dawn a ni.

VB-G RAM-G inzirtir

Saitual district bawrhsap Srinivas Sadi hoin nimin khan DC conference hall-ah khawtlang hruaitute leh line department hotute pualin ni 125 inhlawhna, Viksit Bharat - Guarantee for Rozgar and Ajeevika Mission-Gramin chungchang inhrilhfiahna hun hman a ni. VB-G RAM-G hi MGNREGA thlakna tur a ni a, July 1, 2026-ah hman ṭan tur a ni.

NH himna sawiho

Lawngtlai district bawrhsap Donny Lalruatsanga hoin nimin khan Lawngtlai District Highway Safety Task Force Committee an ṭhukhawm a; Supreme Court thuchhuak anga National Highway himna tur thupekte bawhzui dan tur an rêl. Thupek chhuah ngaite DC leh PWD ten chhuah se, hmalakna hrang hrangte report kimchang siamin ni 60 chhungin Mizoram sorkarah thehluh ni se, an ti.

District aṭangin Refer theih tawh

Lawngtlai District Hospital-a medical superintendent Dr Paul Lalchungnunga chuan thuchhuah siamin, District Hospital aṭanga phaia damlo thawn (refer) chungchangah Aizawl leh Lungleia Medical Board-a kal ngai tawh loin, video conference kaltlangin refer theih a nih tawh thu a tarlang. District Screening Committee ṭhut hun chu Thawhlehni leh Zirtawpni a ni.

Ṭanpuina hlan

Lunglei DC Navneet Mann chuan nimin khan a pisaah Bána Kaih (Handholding) Phase-II hnuaia Lunglei district-a Chief Minister's Special Package dawng tura thlan, department pali hnuaia progress partner mi pariat hnenah placard leh certificate a hlan. Bawrhsap chuan, hlawhtling ngei tura theihtawp chhuah tur leh department-te nen inpawh taka thawkho a, an thurawn leh fuihna ngaichâng thiam turin ṭanpuina dawngtute a chah.