MSPMC-in hnathawh mek pahnih an endik

Mizoram State Project Monitoring Committee (MSPMC) chuan nimin khan sorkar hnuaia hnathawh mek pahnih - Venghnuaia Community Recreation Centre leh Directorate of Economics & Statistics building siamṭhat mekte an endik.

Venghnuaia Community Recreation Centre hi October 2025 khan thawh ṭan niin, October 2027-a zawh tur a ni a, hun tiam chhunga zawh hman tum a ni. SASCI sum vbc 10 hmanga sak a ni a, Aizawl Smart City Ltd. ten enkawlin, Sky Builders, Zemabawk North-in an sa a ni.

MSPMC-in an endik lai hian hna 56% thawh zawh a ni tawh a; contractor hnenah hian a hnathawh tawh bill cheng nuai 300 (42%) pek tawh a ni.

Directorate of Economics & Statistics building chu kum 2014 khan NECS-in turnkey basis-in an sa a, ban leh beam te specification a tlin loh avangin a chak tâwk loa ngaih a ni a, thawm ṭhat mek a ni. Thawm ṭhat hna hi SASCI 2024-25 sum nuai 207 hmangin retro-gitting-a thawh a ni.

Economics & Statistics building retro-fitting hna hi CB Engineering, Venghlui-in an thawk a, Mizoram PWD-in an vil. Thla 12 chhunga zawh tur a ni a; MSPMC-in an endik lai hian 75% zawh a ni tawh a, contractor hnena cheng nuai 100 vel pek a ni tawh.

A hmunin a zir loh avangin a tira hun bituk chhunga zawh hman a ni dawn lo a, September 9, 2026 hma ngeia zawh tura tih a ni.

MSPMC hi hlawm hnihah inṭhenin, hmun pahniha hnathawh kal lai mekte uluk takin an endik a; hna kal meka harsatna awmte sawihoin, ṭha taka hna thawha zawh a nih theih dan tur sawiho a ni.