Upate tawnhriat ram tan a hlu - B Lalchhanzova

MUP, Armed Veng Branch chuan MUP Lengkhawm Zai Intihsiaka pathumna an nih chu nimin khan Armed Veng Community Centre-ah an lawm a; an hun hmanpuitu bialtu MLA B Lalchhanzova, minister of state chuan, upate tawnhriat chu ram tan a hlut thu a sawi.

B Lalchhanzova chuan, MUP member-te chu an kum tam zel mah se, tar tum lo turin a fuih a, "Kum lama upa tak tak, rilru fîm em em ram hruaitu ropui tak tak an awm. Kum upat avangin kan ngaihtuahnate a buai loh nan mahni theihna ang zelin taksate tihriselin chet tam tum ila, chu chuan kan taksa hriselna kawngah a hruai dawn a ni," a ti.

Upate tawnhriat leh ngaihtuahna zau takte chu ram tan a pawimawh thu sawiin B Lalchhanzova chuan, "MUP-in khawtlang leh hnam tana a thawhnate a fakawm. Upate tawnhriatnate hi khawtlang hmasawnna atana pawimawh a ni," a ti a; upate chu an tawnhriatte khawtlang tana hmang ṭangkai zel turin a chah.

Bialtu corporator Christina Roluahpuii Sailo pawhin thu sawiin, "Ṭhangtharte khawvel tih a nih mek lai hian upate hlutna a hniam chuang lo. Kum upate ngaihhlutna chang hre loa ngainêp ṭhin mihring chu an nun a tluangin ka ring lo," a ti a; ṭhangtharte'n upate an ngaihhlut a, an chawimawi thiam zel a pawimawh thu a sawi.

MUP, Armed Veng Branch hnenah bialtu MLA hian Rs 35,000 a pe a, bialtu corporator-in Rs 10,000 a pe bawk.