Minister-in Medal dawngtute lawmpuina hlan

Sport & Youth Services minister Lalnghinglova Hmar chuan nimin khan Hawla Indoor Stadium-ah tun hnaia ram pum huap bân inelh (arm wrestling) leh muaythai inelnaa lawmman late hnenah lawmpuina a hlan a; kut inthlak hmanga infiamna (contact sport) tihhmasawn nan ITI Vengah Centre of Excellence of Boxing din tum a nih thu a sawi.

Lalnghinglova Hmar chuan, Mizoram tihmingṭhatute a chhuan thu sawiin, "Mizoram sorkarin infiammite hmasawnna turin ruahmanna a siam mek zel a, contact sport-te hmasawn nan ITI-ah Centre of Excellence of Boxing din tum a ni a, Ministry of DoNER aṭangin Administrative Approval and Financial Sanction cheng vbc 38.39 sanction a ni tawh. Centre din tur hian infiammite tan hmasawnna a thlen ngei ka beisei," a ti.

May 29 - June 2, 2026 chhung khan Gandhinagar, Gujarat-ah 4th PAFI National Arm Wrestling Championship 2026 neih a ni a, Mizoram aṭanga telte'n gold medal 14, silver medal 13 leh bronze medal pariat an la a, a vaiin medal 35 a ni.

June 1-4, 2026 chhung khan Haldwani, Uttarakhand-ah 7th Youth National Muaythai Championship 2026 buatsaih a ni a, Mizoram aiawha telte'n medal 20 - gold medal pakua, silver medal pariat leh bronze medal pathum an la bawk.

Lawmpuina inkhawm hi Mizoram State Sports Council secretary Henry C Lalrawnkima'n a kaihruai a; infiammi medal dawngtu te, Mizoram Arm Wrestling Association leh Muaythai Association of Mizoram hruaitute an tel a ni.