Champhai district-ah SIR 2026 digitization & verification 68.77% zo tawh

Champhai district election officer (DEO) Mohammad Aaquib, bawrhsap chuan nimin khan a pisaah thuthar thehdarhtute a kâwm a; Electoral Roll Special Intensive Revision (SIR) 2026 kalpui chungchang a hrilhfiah a, enumeration form digitization leh verification hna 68.77% zawh a nih tawh thu a sawi.

Mohammad Aaquib chuan, May 30, 2026 aṭangin enumeration form sem ṭan a nih thu leh, Champhai district-a MLA bial pathum - Champhai North, Champhai South leh East Tuipuia electoral roll-a hming chuang zawng zawng hnenah pek tawh a nih thu a sawi a, "Booth level officer (BLO)-te'n ṭha takin an thawk a, an fakawm. BLO-te'n enumeration form an khawn khawm mek a, digitization leh verification tih mek niin, 40,688 (68.77%) zawh tawh a ni," a ti.

Polling station siamrem tum a nih thu sawiin DEO chuan, "Heng zawng zawng hi hunbi ral hmaa zawh hman vek kan inbeisei. Champhai district-a booth pasarih - Pàmchung, Keifangtlang, Chhungte, Hruaikawn, New Hruaikawn, Bulfekzawl leh Sazêp-ah te enumeration form sem chhuah, lak khawm leh digitize zawh vek a ni tawh," a ti a; Mizoram puma a thawk chak ber district an nih thu a sawi.

Mohammad Aaquib chuan, SIR 2026-ah election officer te, electoral registration officer (ERO) te, assistant ERO te, Election Branch-a thawk te, BLO te, additional BLO-te leh Booth Level Standing Committee-te thawhrimna leh inpeknaah lawmthu a sawi. Chanchinbumite'n thil pawimawhte ṭha taka an puanzar zel avanga an lawm thu sawiin, hma an lak leh zelna turah ṭha taka puanzarsak zel turin a ngen a ni.