Khaw hrang hrangah total bandh huaihawt
The Citizenship (Amendment) Bill, 2016 dodalna lantirna atan India hmarchhak state dangte leh Aizawl khawpui ang bawkin nimin khan Mizoram chhunga district khawpui hrang hrang leh khaw dang ṭhenkhatahte North East Student Organisation (NESO) leh Mizo Zirlai Pawl (MZP) bultumin total bandh huaihawt a ni.
Mizorama district khawpui ni lo zingah Lungsen khuaah pawh bandh huaihawt a ni a, zing dar 8-ah ṭan niin, an khaw chhung hmun pangaah zirlaite an duty a; Lungsen Venglai Branch YMA leh Lungsen Higher Secondary School zirlai ṭhahnem takin an ṭawiawm. Buaina leh harsatna lian tham thleng a awm lo a, chawhnu dar 3-ah bandh chu an titawp a ni.
Thenzawlah pawh MZP sub-headquarters, Thenzawl bultumin zing dar 5 aṭangin total bandh huaihawt a ni a; bandh huaihawt chhungin khawpui chhung kawngpui dungah dawr inhawng a awm lo a, sorkar pisa leh zirna inte khar a ni. Aizawl-Lunglei kawngpuiah lirthei an tlan tlang lo a, khaw daiah bandh titawp hun nghahtir an ni.
Total bandh huaihawt hi an thlawp thu Central YMA chuan January 7 khan a lo tarlang tawh a, nimina bandh neihnaah pawh CYMA hruaitu eng emaw zat chu an thawk chhuak ve a, Treasury Square-a Bill copy halnaah pawh an tel ve a ni. YMA hnuaia sub-headquarters-te pawhin total bandh hi an thlawp tih an tarlang.
Zo Re-unification Organisation (ZoRO) pawhin thuchhuah siamin, Parliament-in The Citizenship (Amendment) Bill, 2016 pass luih a tum duh loh lantirna atana NESO-in hmarchhak pumpuia total bandh an huaihawt chu an thlawp thu an tarlang bawk.