KHAWTHLIR

Central YMA hnuaia ruihhlo dotu, Supply Reduction Service (SRS) duty-te chuan Krismas leh kum thar vuakvêt, December 20, 2018 aṭanga January 7, 2019 inkar chhung khan heroin hawng 20, can 338 leh chhin sen 27 an man a, Alprazolum mûm 1,316 an man bawk. SRS hian December 20, 2018 aṭanga kumin January 7 inkara ruihhlo an man kaihhnawihah mi 178 an la a, chu'ng zinga pahnih chu Police hnenah an hlan. SRS duty-te chuan January 7, Thawhṭanni tlai dar 3:30 vel khan Aizawlah Remsangpuii (34) d/o Bawihlinga (L), Champhai Zion Veng nia insawi hnen aṭangin heroin háwng 4 an man bawk a; heroin hi tualchhunga hralhna ang chuan, Rs. 1,40,000 hû a ni a, Remsangpuii chuan a nuṭâ Lalnghakmawia (33), Champhai Zion Veng ta niin a sawi.

Health minister Dr R Lalthangliana chuan January 7, Thawhṭanni khan Kawrthah damdawi-in, Community Health Centre (CHC) a tlawh a, thawktute leh Kawrthah khawtlangin damdawi-in atana thil ṭul leh mamawh an lo thlente chu a tahtawl tê têa tihhlawhtlin a tum thuin a chháng.

Traffic SP chuan thupek chhuahin, Ropaiabawk leh, Zohnuai leh Vaivakawn inkarah SIPMIU-in pipe phûm hna an thawh chu hun tiam chhunga zawh hman a nih loh avangin January 15, 2019 thleng kawngpuiah lirthei intlan chhâwk a ngai leh dawn tih a tarlang a, "Kawng sirah lirthei leh thil dang reng reng dah/park phal a ni lo. January 15 aṭangin Zohnuai leh Vaivakawn inkarah water pipeline phûm hna thawh chhunzawm tur a nih avangin hna thawh hun chhungin kawngpuiah lirthei reng reng tlan phal a ni lo," a ti. 

Vanrinliana (55), Champhai Vengsang (Hospital Veng) chu January 7, Thawhṭanni khan Champhai District Hospital building hlui an ṭhiahnaah in chung 

aṭangin a tla a, a hliam tuar loin a thi. 

All India Postal Employee Union (AIPEU) chuan an thil phûtte nawr nan vawiin hian India ram pumah lungawi lohna an lantir dawn avangin Post office-te khâr a ni dawn a, Mizorama Post office hrang hrangte pawh khar a ni ang.