NE hi India rama footballer ṭha chher chhuaktu a ni - K Sapdanga
Home minister K Sapdanga chuan nimin khan Rajiv Gandhi Stadium-ah National Cadet Corps (NCC) Inter-Group Pre-Subroto U-17 Girls Football Tournament a hawng a; hmarchhak state-te chu India rama footballer ṭha chher chhuaktu an nih thu a sawi.
K Sapdanga chuan, hmarchhak state hrang hrang aṭanga infiammi telte chu duhsakna a hlan a, "Hmarchhak state-te hi India ram pumpuia footballer ṭha tak tak chher chhuak ṭhintu kan ni," a ti a; India ram mai ni lo, ram dang thlenga khel tlak khawpa inzir zel tur leh theihtawp chhuah turin tournament-a tel tleirawlte a chah.
NCC-in India hmarchhak tleirawlte tan football-a inelna an buatsaih chu ṭha a tih thu sawiin, "Football khel tura quality pawimawhte hi NCC kalphung nen pawha inmil tak a ni... Hmeichhe inkhel ṭhinte tana kawng hawnsaktu pawimawh tak a ni," a ti a; inelna a nih rualin, inunauna ṭha siam nan hmang tel turin inkhel turte a chah.
Minister hian tournament trophy leh medal a tlangzarh nghal a ni.
Inelna hi NCC North Eastern Region buatsaih a ni a, NCC Group Hqrs, Aizawlin a thleng. Hmarchhak state hrang hrang aṭangin team pariat - Aizawl Group, Silchar Group, Kohima Group, Jorhat Group, Guwahati Group, Shillong Group, Tezpur Group leh Dibrugarh Group te an tel a; June 17, 2026-ah final khelh tur niin, champion team chu August 2026-a neih tur Delhi-a International Football Cup-ah tirh an ni ang.