KHAWTHLIR

MCAB-in loan dilna 108 pawm

Mizoram Cooperative Apex Bank Board of Directors chu nimin khan an pisaah an ṭhukhawm a, chairman Lalnunsanga'n a kaihruai. Loan dilna 108 pawmin, cheng vbc 25.56 pek an remti a; loan dilna an pawmte chu mimal leh pawl aṭangin a ni a, agriculture, sumdawnna, Bana Kaih (Handholding) leh biak-in sakna tur loan-te a ni. Bank inrêlbâwlnate ngaihtuah a nih bakah, Bank Policy thar duante an pawm bawk. Apex Bank hian branch 35 an nei mek a ni.

END-in heroin man

Excise & Narcotics enforcement-te chuan nimin chawhma dar 10:30 khan Champhai Zotlangah car MZ-01 L-0335 aṭangin heroin gram 99 (hawng 8) an man a, a neitua puh Ikbal Hussain (28), Karimganj, Assam nia inchhal an man nghal bawk. The Narcotics Drugs & Psychotropic Substances Act, 1985 thlawhchhanin thubuai ziah luh a ni.

SIR 2026-ah voter 45.32% thun tawh

Electoral roll ennawn rûnpui, Special Intensive Revision (SIR) 2026 neih mekah nimin chawhma lam thleng khan portal-ah enumeration form 3,96,570 thun luh (digitise) a ni tawh. Official tarlan danin, Mizoram electoral roll hman laiah voter 8,75,068 an awm a, chu'ng zinga mi 3,96,570-te chu SIR portal-ah thun tawh niin, vote zawng zawng aṭangin 45.32% a ni.

Sorkar hnathawk MST bus titawp

Transport department chuan, June thla aṭanga No Official Vehicle Day avanga sorkar hnathawkte pisa kal lam leh haw lamin an hman theih tura MST bus a tlantir chu hmangtu (passenger) an awm loh avangin tihtawp a nih thu a tarlang. Tunlaia US-Israel leh Iran indona vanga tuialhthei renchemna atana sorkar ruahman angin chawlhkar tin Nilaini chu sorkar lirthei tlan chhuah loh ni, No Official Vehicle Day atan hman mek a ni.

Police tan training

Khawzawl SP F Lalbiakzauva chuan nimin khan Khawzawl Police Station-ah Khawzawl SDPO leh Khawzawl PS-a awmte tana Police Portal leh police station-a hnathawh dante inzirtirna, ‘In-Service Training’ a hawng.