CM-in Serchhipah kawng thar a hawng

Chief minister Lalduhoma chuan June 9, Thawhlehni khan a bial chhunga Serchhip Bâwngchâwm tlanga paragliding tihna hmun panna kawng leh Mat Zawlpui panna kawng siam thar a hawng.

CM Lalduhoma chuan, Bawngchawm leh Zawlpui vel chu khawvel huapa paragliding sports tihna atan hmunhma ṭha a tlin thu a sawi a, "Mizoram tan chuan Pathian thilthlawnpek hmun a ni a, a hlutna ang taka kan hman thiam hian min petu Pathian pawh a lawmin a rinawm. A panna kawngpui a lo ṭhat tâkah chuan Mizoramin international sport event kan huaihawt theih paragliding sport hi inthlahrung lo takin kan huaihawt fo thei tawh dawn a ni," a ti.

Kawng an hawn tâk chu Serchhip leh Mizoram tan hmasawnna tur a nih thu sawiin Lalduhoma chuan, "Paragliding ringawt hisâpa siam kan ni lo. Zawlpui leh a chhehvel zaù kawngte khu kan kut hnathawktute hmakhua ngaihtuahna vanga siam kan ni a, kut hnathawktu chhungkaw tam takin an chhawr dawn a, kan ram economy tana thil ṭangkai a ni," a ti a; Zawlpuia paragliding ṭumna (landing site)-in a zár a zo ve chauh zawk niin a sawi.

Paragliding thlawh chhuahna hmun Bawngchawm panna kawng hi km 4.70 niin, kawng zau zawng metre 5.50 (kawng chhuat phah chin zau zawng metre 3) a ni a, sum ruahman (contractor agreement) zat chu Rs 3,45,63,310 a ni. Mat Zawlpuia zau hrang hrang inkalpawhna kawng siam thui zawng km 11.20 niin, a zau zawng metre 5.50 (kawng chhuat phah chin zau zawng metre 3) a ni a, sum ruahman chu Rs 9,63,30,359 a ni.

Hna pahnih hi NABARD sum hmanga thawh a ni a, contactor chu Evergreen Construction & Consultancy, Aizawl an ni.