Speaker hoin zirlai ti ṭha chawimawi

Assembly speaker Lalbiakzama chuan nimin khan MZP Headquarters, Saitualin Saitual College auditorium-a Saitual district-a zirlai ti ṭha chawimawina hun an buatsaih a hmanpui a; all India service leh central service-ah Mizo tam zawk an tlin theih nan ṭhalaite'n ṭan la se a duh thu a sawi.

Lalbiakzama chuan, zirlaite'n an tum an tihsan a ṭul thu sawiin, kum 1966 aṭanga 1990 inkar velah kum tinin IAS tling Mizo pahnih/pathum an lang ṭhin a, Mizoram chu 'IAS factory' tia sawi a nih thu a sawi a, "All India leh central service lamah Mizo ṭhalai tam zawk tling thei se ka duh a, vawiina zirlaite'n kan tum kan tihsàn a ngai," a ti.

Zirlai zawng zawng IAS an ni vek thei dawn lo tih sawiin Speaker chuan, "Kan kawng ṭheuha kan hlawhtlin theih nan mahni inhriat chian, tuina zawng hriat, rilru puthmang dik, mi dang biakrâwn tam, hmanhmawh loh leh ruahmanna ṭha neih a pawimawh," a ti a; zirna leh hnathawhah thawhrimna, tumruhna leh teirei peihna nei turin zirlaite a fuih.

Zirlai ti ṭhate chawimawinaah hian Saitual SDC R Vanlalfaka pawhin thu a sawi a ni.