February thla chhungin budget session neih zawh hman kan tum - Assembly Speaker

Mizoram Legislative Assembly speaker Lalrinliana Sailo chuan, sorkar kum tawp dawna rîk rum rum a ngaih lohna turin kumin February chhungin budget session neih zawh vek tum a nih thu a sawi.

Lalrinliana Sailo hian nimin khan MNF party pisa, Mizo Hnam Rûna inkhawmah thu sawiin, sorkar kum tàwp dawn, March thla tàwp lamah tlaivar dáwn dáwna sum buaipui a ngaih ṭhin thu a sawi a, "Kan Chief Minister ka ráwn a, tunah chuan tuilêt hnua la tih ngai loh angin, February-ah budget session kan zo vek ang," a ti.

Minister leh sorkar official-te'n March thlaah Delhi-a pawisa chuangbâng la hman loh an ûm theih tur thu sawiin Speaker chuan, "A ṭha zawk turah chuan kalphung thlak a ngai ṭhin," a ti a; ram hlui zia - March thla tàwp lama sum inchuh vak vak kalsan an tum thu a sawi.

Tun hnaia Bangladesh a tlawh chungchang sawiin Lalrinliana Sailo chuan, "Bangladesh-ah Zo hnahthlak, ringtu ṭha 30,000 vel an awm. Ka vawi nga kalna a ni a, tun ṭum ka kal pawh Prime Minister, High Commissioner te, office hrang hrang leh factory hrang hrangte ka tlawh a, lawmna thar tak ka nei. Ni danga inhawng vak lo ṭhin kha Mizoram tan an inhawng thar em em a ni," a ti.

Lalrinliana Sailo chuan, CM Zoramthanga hoin Mizoram sorkar chu Pathianin a hmang dawn hlea a hriat thu sawiin, "Bangladesh-in an president Sheik Hasina pa kum 100 lawmnaah tel tura sàwmna an rawn thehluh avang pawh hian kawng thar a inrek dawnin ka hria," a ti a; Bangladesh-a thuneitute chuan Tlabung, Kawr­puichhuah kawng chungchang pawh tihpuitlin an tum thu an sawi niin a tarlang.