VB-G RAM G chungchang zirho

Kolasib district bawrhsap H Dolianbuaia kaihhruaiin nimin khan DC conference hall-ah ni 100 inhlawhna (MGNREGS) thlakna tura duan, ni 125 inhlawhna, Viksit Bharat - Guarantee for Rozgar and Ajeevika Mission-Gramin (VB-G RAM G) chungchang zirho a ni.

H Dolianbuaia chuan, Mizoram mipui 70% vel chu thingtlanga cheng an nih thu a sawi a, "Sorkar laipuiin thingtlang mipui tana inhlawhna tur VB-G RAM G a duang hi a vanneihthlak hle. India ramin zalenna a hmuh aṭanga kum 100 a tlinna tur, kum 2047 hma ngeia ram changkang (developed nation) kan nih theih nan sorkar laipuiin nasa takin hma a la mek a ni," a ti.

Khawpui leh thing-tlangah hmasawnna rualkhai tak a awm theih nan VB-G RAM G chu ṭangkai taka hman a ṭul thu sawiin Bawrhsap chuan, VB-GRAM G-in a tum ber leh a ruahmannate thingtlang mipui hnena a taka a thlen theih nan line department-te chu hrui khat vuana ṭang tláng a, a theih chin chinah thawh-hona uar turin a chah.