Jan - Mar 2026 chhunga Serchhip district-a bank-te CD ratio 70.43%

Serchhip district bawrhsap Paul L Khuma hoin nimin khan January-March, 2026 chhunga Serchhip district-a bank hrang hrangte dinhmun thlirho a ni a; January-March, 2026 chhungin Serchhip district-a bank-te credit deposit ratio chawhrual chu 70.43% a nih thu an tarlang.

Ṭhutkhawmah hian sorkar laipui scheme hrang hrang - NRLM, NULM, PMEGP, SUI, PMMY, KCC leh Social Welfare scheme PMJJBY, PMSBY, APY leh a dangte hnuaia hmalaknate leh bank-te thawh dan (performance) report thlirho a ni a, ṭan lak ngaihna laite sawiho a ni.

Tarlan danin, January-March 2026 chhung khan Serchhip district-a bank hrang hranga pawisa dah luh zat chu cheng nuai 63,250.18 a ni a, bank-te'n loan an pek chhuah zat chu cheng nuai 44,544.22 niin, CD ratio 70.43% a ni.

January-March chhung khan Pradhan Mantri MUDRA Yojana (PMMY) hnuaiah mi 326 hnenah loan cheng nuai 1,163.41 pek a ni a, National Rural Livelihood Mission (NRLM) hnuaiah self help group (SHG) 128 hnenah nuai 612.95 pek a ni. Pradhan Mantri Jan Dhan Yojana hnuaiah bank account 22,813 hawn a ni tawh bawk.