SIR 2026 ngawrh takin bawhzui mek

Electoral roll ennawn rûnpui, Special Intensive Revision (SIR) 2026 chu district tinah ngawrh taka buaipui mek zel a ni a; district hrang hranga district election officer (DEO) - bawrhsapte'n a ṭul ang zelin hma an la ṭhin.

Lawngtlai DEO Donny Lalruatsanga chuan nimin khan a pisaah Lawngtlai khawpui pawn lama BLO pathumte'n SIR 2026 an buaipui mek dan a sawipui. Bawrhsap chuan, enumeration forms lak khawm leh digitization-ah hmasawnna tur a awm tih sawiin, Election Commission of India-in SIR 2026 a ngaih pawimawh avangin ECI beisei ang taka hna thawh chhunzawm zel a ṭul thu a sawi.

Nimin vêk khan Mamit DC conference hall-ah Voter Awareness Forum buatsaih niin, Mamit khawpui chhunga pisa hrang hrang aṭanga nodal officer-te tan SIR chungchang zirho hun hman a ni a, DEO Suvigya S Chandra-a'n a hawng.

Bawrhsap Suvigya S Chandra chuan India khua leh tui vote nei thei chinte tana electoral roll thar siam tura hmalak mekah BLO-te ṭawiawm a, ṭha taka lo dawngsawng turin mipui a chah. Election officer Lalnunfela Chawngthu-in SIR enumeration form dahkhah dan a sawifiah a; DC pisaa UDC Ramropuia'n online hmanga SIR form dahkhah dan a zirtir bawk.

June 9, Thawhlehni khan Champhai DC conference hall-ah SIR chungchangah Voter Awareness Forum chungchang inhrilhfiahna buatsaih a ni. Champhai sorkar pisa hrang hranga mite an tel a, DC pisaa election officer Ngulzathuama bakah, Kawlhmingliani leh J Lalthanmawia ten enumeration form leh declaration form dahkhah dan leh SIR chungchanga pawimawh dangte an sawifiah.

Champhai DEO Mohammad Aaquib chuan, inthlanna thil reng reng chu khua leh tuite'n an ngaih pawimawh tur a nih thu sawiin, electoral roll-a thun theih zawng zawng thun vek an nih theih nan VAF hnuaia ruatte'n enumeration form dahkhah dan leh thehluh dan chiang taka an hriat a, mi dang an zirtir theih a ṭul thu a sawi.