Bawlhhlawh sâwngbâwlna hmun tur siam mek UDPA Minister-in a enfiah

Urban Development and Poverty Alleviation (UDPA) minister K Sap-danga chuan nimin khan Aizawl Smart City Ltd hnuaia hna kal lai Material Recovery Facility a tlawh a, hnathawh dan a enfiah.

UDPA Minister hi UDPA secretary K Lalthawm-mawia, director Jacob Lal-awmpuia, joint secretary Lalzarliani leh Aizawl Smart City Ltd chief executive officer CC Lalchhuangkima ten an ṭawiawm.

Aizawl Smart City Ltd chuan Aizawl Municipal Corporation, Nepra Resource Management Pvt Ltd, Ahmedabad, leh JN Buildcon, Aizawl te nen November 27, 2024 khan Material Recovery Facility (MRF) dinna atan Industrial Growth Centre, Luangmualah tripartite agreement an siam.

MRF-ah hian bawlhhlawh ṭawih thei lo (dry waste) enkawlna leh sâwngbâwlna ṭha leh rintlak siam tum a ni a; AMC huam chhunga bawlhhlawh khawnte ṭhen hran a ni dawn. Hman nawn atana siam (re-cycle) theihte chu sâwngbâwl a ni ang a; plastic, paper, thir, electronic waste leh a dangte chu re-cycle turin hralh chhuah emaw, re-cycle ti ṭhinte hnenah hlan emaw a ni ang.

Re-cycle theih loh bawlhhlawhte chu ṭhen sawm (shredded) a ni ang a, cement factory-te hman turin refuse-derived fuel angin thawn chhuah tura ruahman a ni.

Tripartite agreement hnuaiah hian Nepra Resource Management chuan kum 10 chhung MRF an enkawl dawn a; MRF hian ni khatah bawlhhlawh ton 75 dâwl thei tura ngaih a ni. MRF sak mekah hian khawl a thleng kim ṭêp tawh a, physcial progress 63% niin, August 15, 2026-ah enchhin (trial run) hman tum a ni.