KHAWTHLIR

Kawngpui sawiho

Serchhip DC Paul L Khuma hoin nimin khan sorkar laipuiin National Highway siamna atana ram a lak tawhte leh kawng dinhmunte sawiho a ni. Ram neitu dik takte'n an chanvo an hmuh theihna tur leh nakin zela inhnialna pumpelhna atan Land Revenue & Settlement department leh NHIDCL ten a rang lama an chinfel dan tur rêl a ni a; fûr laia kawng chhe mai theite leh siamṭhat hna chak taka thawh a nih theih dan turte sawiho a ni bawk.

Inhnûkdâwk awm lo

Mizoram Rajya Sabha MP thlan turah nimin khan inhnuhdawh theih hun a tawp a, inhnûkdâwk an awm lo. MP thlan turah hian ZPM candidate K Laltluangkima leh MNF candidate Zothansangi Hmar ten hming an pe lut a, anni hi MP candidate an ni dawn ta a ni. June 18, 2026-ah vote thlak a ni ang a, vote thlak zawh tlai dar 5-ah vote chhiar nghal a ni ang.

RIPANS hotu hmu

Mizo Students’ Union hruaitute chuan nimin khan Regional Institute of Paramedical and Nursing Sciences (RIPANS) director Dr Sanjay D. Sawant chu a pisaah an hmu a, RIPANS-ah academic leh hospital recruitment-a Mizo a tam thei ang ber an luh theih nan hma la turin an ngen. Ram leilung fate an luh theih nan hma an lak ṭhin tawh thu leh theihtawp an chhuah zel dawn thu RIPANS Director-in a lo hrilh niin MSU chuan an tarlang.

Kawng khâr dawn

Aizawl Traffic SP C Vanlalvena chuan hriattirna chhuahin, Tuikual South High School leh Tuikual Primary School inkar kawngah pipe phûm a nih dawn avangin, zanin dar 9 aṭanga naktuk zing dar 5 thleng kawng khâr a nih dawn thu a tarlang.