Minister leh Arunachal zirlaite inkâwm

Information, Public Relations, Printing & Stationery (IPRPS) minister B Lalchhanzova chuan nimin khan a pisaah Arunachal Pradesh University-a Mass Communication (PG) second semester zirlaite a kâwm a; hmarchhak state ṭhalaite zingah thiamna leh theihna tam tak a awm thu a sawi.

B Lalchhanzova chuan, hmarchhak ṭhalaitea thiamna leh theihna tam tak awm chu hmanh chhuak turin ngaihtuahna zau zawk neih a ṭul thu sawiin, "In ngaihdan tlang taka sawi chhuah ṭhin te, mahni inrintawkna neih leh mahni lungawina aṭanga chhuahte a pawimawh," a ti a; hmarchhak state dangte nen inunauna leh inpumkhatna rilru pu reng turin a chah.

IPR Minister chuan, zirlaite chu an hma lam hun atan duhsakna a hlan a; puih theihna a neih chuan pui tur leh thawhhopui turin Mizoram leh mipui an inpeih reng thu a hrilh.

Inkawmnaah hian PIB Aizawl head of office Dr Rajeev Lourembam, MJA president Vanlalrema Vantawl, IPR joint director Mina Zoliani leh minister private secretary Remlalliana Hnamte te pawhin thu an sawi a; Arunachal Pradesh University-a zirtirtute'n an dinhmun leh Mizorama an hun hmante an sawi bawk.