Jute chìnna atan MoU ziah a ni

Agriculture & Farmers’ Welfare (AFW) minister PC Vanlalruata pisaah nimin khan AFW department, Jute Corporation of India (JCI), National Jute Board (NJB) leh Indian Council of Agricultural Research - Central Research Institute for Jute and Allied Fibers (ICAR-CRIJAF) te chuan thawhhona thuthlung, memorandum of understanding (MoU) an ziak.

Thawhhona kaltlang hian NJB-in jute cultivation atan Jute-iCARE project an kalpui mek chu Lunglei, Lawngtlai leh Mamit district-ah kalpui a ni dawn. JCI-in loneitute chu jute chungchanga hriat tur pawimawhte an zirtir dawn bakah, jute tharte chu sorkar laipuiin minimum support price a bituk ang zelin loneitute hnen aṭangin an lei dawn. ICAR-CRIJAF-in hlawhtling taka jute chìn a nih theih nan research leh technical thila ṭanpuina ṭulte an kalpui dawn thung.

NJB leh JCI kaltlang hian sorkar laipui chuan jute chíng tura ṭul - a chi (seed) te, chìnna hmanrua leh khawl bakah, a sawngbawlna hmanruate thlengin a thlawnin an tum dawn a; Lunglei district-a Tlabung MPACS nen ṭang dunin jute cultivation kalpui ṭan a ni tawh.

Minister PC Vanlalruata chuan, thuthlung ziah a ni chu a lawm thu leh sum lak luh tihpunna ṭha a nih dawn thu a sawi a; a hlawhtlin ngei theih nan theihtawp chhuah zui zel turin MoU ziahnaa telte a ngen a ni.