Corporator-te'n SWMC-ah thing phun

World Environment Day (June 5) puala hmalakna kal zelah AMC corporator-te chuan nimin khan Aizawl bawlhhlawh sawng-bawlna, Solid Waste Management Center, Tuirialah thing an phun.

World Environment Day puala thing phun hi ‘Ek Ped Maa ke Naam’ programme anga hman nghal a ni a; mayor H Lalremtluanga chuan, bawlhhlawh ṭawih thei leh ṭawih thei lote SWMC, Tuirialah paih fin vek anga sawi ṭhin a dik loh thu a sawi a, "Bawlhhlawh paihna hmun hrang mumal tak siam a ni a, a theih anga tam sawngbawl a ni. Material Recovery Facility, Luangmuala siam mek peih a nih hunah chuan bawlhhlawh thliar hranah nasa lehzuala ṭan lak a ngai dawn," a ti.

AMC corporator-te hian Aizawl bawlhhlawh sawngbawlnain hma a sawn theih nan theihtawp chhuah an tum a; ward tinah bawlhhlawh thliar hran chungchang campaign an neih bakah, vawiin hian ward tinah hnatlang koin, tihfai ngai hmun pakhat ṭheuh an tifai dawn a ni.